داۋرەن ابايەۆ: جاڭا كونستيتۋسيا ورىس ءتىلىنىڭ مارتەبەسىن ساقتايدى
قازاقستاننىڭ رەسەيدەگى ەلشىسى داۋرەن ابايەۆ رەفەرەندۋمدا قابىلدانعان جاڭا كونستيتۋسيا ەلدە ورىس ءتىلى مەن ءورىستىلدى ازاماتتاردىڭ قۇقىقتارىن قورعاۋ باعىتى جالعاساتىنىن مالىمدەدى. سونداي-اق ول قازاقستاننىڭ رەسەي ءۇشىن سەنىمدى ءارى تۇراقتى سەرىكتەس بولىپ قالا بەرەتىنىن اتاپ ءوتتى، دەپ حابارلايدى Dalanews.kz.
ابايەۆتىڭ سوزىنشە، كونستيتۋسيا ءماتىنىنىڭ قازاق جانە ورىس تىلدەرىندە بىردەي زاڭدى كۇشپەن جاريالانۋى – مەملەكەت تاراپىنان ورىس ءتىلى مەن ءورىستىلدى حالىقتى قورعاۋعا دەگەن ۇستانىمنىڭ ناقتى دالەلى.
"قازاقستان حالىقارالىق ارەنادا رەسەيدىڭ سەنىمدى ءارى بولجامدى سەرىكتەسى بولىپ قالا بەرەدى. ەلىمىزدە ورىس ءتىلىنىڭ جوعارى مارتەبەسى ساقتالادى. پرەزيدەنت قاسىم-جومارت توقايەۆ اتاپ وتكەندەي، كونستيتۋسيانىڭ قازاق جانە ورىس تىلدەرىندە تەڭ زاڭدى كۇشكە يە بولۋى – مەملەكەتىمىزدىڭ وسى باعىتتاعى دايەكتى ساياساتىن كورسەتەدى"، - دەدى ەلشى.
ول سونداي-اق جاڭارتىلعان كونستيتۋسيا ادام قۇقىقتارىن قورعاۋعا باسىمدىق بەرەتىنىن جانە ەلدىڭ ۇزاق مەرزىمدى دامۋىنا نەگىز قالايتىنىن ايتتى.
بۇدان بولەك، ابايەۆ رەفەرەندۋمدى باقىلاۋعا قاتىسقان رەسەي تاراپىنا العىس ءبىلدىردى.
ايتا كەتەيىك، جاڭا كونستيتۋسيانى قابىلداۋ جونىندەگى رەفەرەندۋم قازاقستاندا 15 ناۋرىزدا ءوتتى. ونىڭ رەسمي قورىتىندىلارى 17 ناۋرىزدا جاريالاندى.
