پرەزيدەنت قاسىم-جومارت توقايەۆ كونستيتۋسيانى قابىلداۋعا ارنالعان سالتاناتتى جيىنعا قاتىستى،دەپ حابارلايدى Dalanews.kz.
مەملەكەت باسشىسى اكىمشىلىك ىستەر بويىنشا راقىمشىلىق جاسالاتىنىن جاريالادى.
"وزدەرىڭىزگە ءمالىم، بىلتىر قىلمىستىق جاۋاپكەرشىلىككە تارتىلعاندارعا راقىمشىلىق جاسالدى. ەندى ازاماتتار مەن مەملەكەتتىڭ قاۋىپسىزدىگىنە قاتەر توندىرمەيتىن ءبىرقاتار قىلمىستىق جانە اكىمشىلىك قۇقىقبۇزۋشىلىق بويىنشا تاعى دا راقىمشىلىق جاريالاۋعا بولادى. ەلىمىزدە اكىمشىلىك ىستەر بويىنشا راقىمشىلىق العاش رەت جاسالاتىنىن اتاپ وتكىم كەلەدى. پارلامەنت قازىرگى سەسسيانىڭ سوڭىنا دەيىن ءتيىستى زاڭ قابىلداۋى كەرەك. بۇل – نەگىزگى زاڭداعى ادامگەرشىلىك يدەالدارى مەن پروگرەسسيۆتى قۇندىلىقتاردى قوعامدا ورنىقتىراتىن ماڭىزدى قادام"، - دەدى توقايەۆ.
قاسىم-جومارت توقايەۆتىڭ ايتۋىنشا، جاڭا كونستيتۋسيا – حالقىمىزدىڭ ىنتىماق-بىرلىگىنىڭ جارقىن سيمۆولى.
"ونىڭ باپتارىندا ءاربىر قازاقستاندىقتىڭ ارمانى مەن اڭسارى، ۇرپاعىنىڭ باياندى بولاشاعىنا دەگەن ءۇمىتى مەن سەنىمى كورىنىس تاپقان. اتا زاڭ بارشا ازاماتتىڭ – وتانىمىزدىڭ شىنايى پاتريوتتارىنىڭ باستى باعدارىنا اينالادى. قازاقستاننىڭ جاڭا كونستيتۋسياسى – الەمدىك وركەنيەتتىڭ بيىگىنە بەت العان ۇلتىمىزدىڭ بەرىك ءارى مىزعىماس تۇعىرى. بۇعان ەشقانداي كۇمانىم جوق. سىزدەردىڭ دە ءشۇبالارىڭىز بولمايدى دەپ ويلايمىن"، - دەدى مەملەكەت باسشىسى.
