ورازا ايىندا اۋىز اشار بەرۋدىڭ ساۋابى قانداي، ونىڭ دا وزىندىك شارتتارى بار ما؟ مۇمكىن بولسا، وسى جايلى جازا كەتسەڭىزدەر ەكەن.
قازاقستان مۇسىلماندارى ءدىني باسقارماسى ماماندارىنىڭ ايتۋىنشا، اۋىز اشار بەرۋدىڭ ساۋابى وتە مول. پايعامبارىمىز (س.ع.س.): «اۋزى بەرىك جاندى اۋىزاشارعا شاقىرىپ تاماق بەرگەن كىسى – ورازا ۇستاعان ادامنىڭ الاتىنىنداي ساۋاپ الادى. اۋزى بەرىك ادامنىڭ ساۋابىنان دا ەش نارسە كەمىمەيدى»، دەگەن. رامازان ايىنىڭ كەلۋىمەن قاتار اۋىزاشار بەرۋ دە كوبەيە تۇسەدى. جورا جولداستارىمىزبەن جاقىن تۋىستارىمىزدى اۋىزاشارعا شاقىرعان سياقتى، ءبىز دە ولاردىڭ قوناعى بولامىز. وسىلايشا ادامداردىڭ بىر-بىرىنە دەگەن باۋىرمالدىق، جومارتتىق سەزىمدەرى ارتا تۇسەدى. ءبىراق ادامداردى اۋىزاشارعا شاقىرامىن دەپ قاتتى شىعىندالماۋ دا كەرەك. ارينە داستارحاننىڭ ءساندى ءارى مول بولعانى جاقسى-اۋ، ءبىراق ءسىزدىڭ الەۋمەتتىك جاعدايىڭىزدى ويسىراتا تۇسپەۋى كەرەك. پايعامبارىمىزدىڭ حاديستەرىنە ۇڭىلەر بولساق ءبىر جۇتىم سۋ، ءسۇت نەمەسە قۇرمامەن دە اۋىزاشار بەرۋگە بولاتىندىعىن مەڭزەگەن. ەگەر دە ءسىزدىڭ جاعدايىڭىز مول داستارحان جاساۋعا كەلىپ جاتسا وندا وعان دا رۇحسات. ياعني پايعامبارىمىز (س.ع.س.) ەڭ از مۇلشەردە اۋىزاشار بەرسە دە ساۋاپقا كەنەلەتىنىن ايتقىسى كەلگەن ەدى. رامازاندا اۋىز-اشار بەرىپ ساۋاپقا كەنەلۋمەن قاتار، پايعامبارىمىزدىڭ (س.ع.س.) سۇننەتىن دە ورىنداعان بولىپ سانالادى. ال اۋىزاشارعا كەلگەن ادامنىڭ دا دۇعا جاساۋى سۇننەت. پايعامبارىمىز (س.ع.س.) ساعد يبن مۋازدىڭ (ر.ا.) ۇيىندە اۋىزاشارعا بارادى. سول جەردە داستارحان باسىندا پايعامبارىمىز (س.ع.س.): «داستارحانىڭىزدان ورازا ۇستاعاندار ءدام تاتسىن. استارىڭىزدى ىزگى كىسىلەر جەپ، پەرىشتەلەر سىزدەرگە دۇعا ەتسىن» دەپ دۇعا جاساعان ەدى. ءابۋ شەيح يبن حيبباننىڭ ريۋاياتى بويىنشا پايعامبارىمىز (س.ع.س.): «ەگەر دە كىمدە-كىم رامازان ايىندا ادال تابىسىمەن اۋىزاشار بەرسە، پەرىشتەلەر رامازان ايىنىڭ سوڭىنا دەيىن وعان دۇعا جاسايدى…» دەگەن. سوندا ريۋايات ەتۋشى: ۋا، راسۋل اللا! اۋىزاشارعا ەشتەڭە تاپپاسا نە ىستەيدى؟ دەدى. – «ءبىر ءتىلىم نان بەرسىن» دەدى. – «ول دا بولماسا شە؟» – «وندا قارا سۋ بەرسىن» دەدى. ولاي بولسا اۋىزاشار بەرۋدىڭ قاتىپ قالعان شارتى جوق ەكەن. شاماڭىزعا قاراي اۋزى بەرىك جاندارمەن بىرگە اۋىز اشۋ جانە جوق-جىتىكتەرگە قاراسىپ، كەدەيلەرگە قول ۇشىن بەرۋ – مۇستاحاپ.
