جەمقورلىقتىڭ ولشەمى
جۇرتتىڭ جەمقورلىققا ەتى ۇيرەنىپ كەتتى، بايقايسىز با؟ بۇرىندارى جەمقورلىققا ۇرىنعان ادامدى قوعام ىستىككە شانشىپ تىك كوتەرمەسە دە، حالىق الدىندا ابىروي-بەدەلىنەن ايىرۋشى ەدى. ءقازىر جەمقورلىق ارەكەتكە قاتىستى وزىندىك ۇعىم، ولشەم-پايىم قالىپتاستى.
جەمقورلىقپەن ءىستى بولعان باسشىلاردى اقتاۋ، ولار جايىندا جاقسى پىكىر قالىپتاستىرۋ سىندى حالىقتىڭ وي-ساناسىن كەرى سۇيرەيتىن ۇردىستەر ءجۇرىپ جاتىر. وسىعان دەيىن ءىستى بولعان شەندىلەردىڭ ەشقايسىسى سوت زالىندا ءوزىنىڭ حالىق قارجىسىن جىمقىرعانىن مويىنداپ، جۇرتتان كەشىرىم سۇراعانىن كورمەدىك.
كۇنى كەشەگى ۇكىمەت باسقارعان سەرىك احمەتوۆتەن باستاپ ەرلان ارىن، باۋىرجان ءابدىش، انار مەشىنبايەۆا – ءبارى-بارى قولمەن ىستەگەن ءىسىن موينىمەن كوتەرمەدى. جازىقسىز... تازا... كۇيىندە تۇرمەنىڭ تورىنەن ءبىر-اق شىقتى. ولار سوت الدىندا وزدەرىنىڭ ايىبى جوق ەكەنىن دالەلدەي العان جوق. ءتىپتى، كەيبىرەۋلەرى مەملەكەت قازىناسىنان جىمقىرعان اقشالارىن قازىناعا قايتارسا دا، كىناسىن ءبىلىپ، جۇزدەرى قىزعارمادى.
تۇڭعىشباي كۇرەستى قاشان باستادى؟
ەندى جامانقۇلوۆتىڭ ىسىنە ورالساق. سوڭعى جىلدارى اكتەر تالاي رەت داۋعا قالعانىن بىلەمىز. م.اۋەزوۆ اتىنداعى اكادەميالىق دراما تەاترىنا ديرەكتور بولعان كۇننەن باستاپ تالاي ماسەلەمەن بەتپە-بەت كەلدى.
ول كەزدە تۇقاڭ اكەمتەاترداعى يەرارحيالىق جۇيەگە قارسى شىعىپ، ەڭ سوڭىندا ءمۇيىزى قاراعايداي اعالارىن وزىنە قارسى قويىپ الدى.
مىنە، سودان بەرى اتاعى جەر جارعان اكتەرلەر رەتى كەلگەندە تۇقاڭدى مۇيىزدەپ قالۋدىڭ مۇمكىندىگىن ءمۇلت جىبەرگەن ەمەس. وسىلايشا تۇقاڭ ءوز ورتاسىنان «ماڭگىلىك جاۋ» تاۋىپ الدى. كەزىندە بۇل ىسكە اقپارات قۇرالدارى ارالاسىپ، بۇل داۋ تۇڭعىشبايدى تۇقىرتۋمەن اياقتالعان-دى.
بىلسەك، ول كەزدە جامانقۇلوۆ تەاتردى تۇلەتىپ، جاستارعا مۇمكىندىك تۋعىزۋ ءۇشىن بەل بۋىپ، بىلەك سىبانا كىرىسكەن ەدى...
ونىڭ بۇگىنگى داۋىنىڭ ءجونى بولەك. كەيبىرەۋلەر مادەني ورتادا «داۋكەس» رەتىندە تانىلعان تۇڭعىشباي جامانقۇلوۆقا مەملەكەت تاراپىنان كينو ءتۇسىرۋ ءۇشىن بولىنگەن قارجىنى تالان-تاراجعا سالدى دەگەن كۇدىك كەلتىرۋدە.
«فەنيكس» ءفيلمى ءۇشىن بولىنگەن قارجىنىڭ قولدى بولدى دەگەن سوماسىن باسقا جەمقورلىق فاكتىلەرىمەن سالىستىرساق، بالانىڭ ويىنى سياقتى كورىنۋى مۇمكىن. ءبىراق، زاڭ الدىندا جەمقورلىقتىڭ ۇلكەن-كىشىسى بولمايدى. سوندىقتان، بۇل جەردە تۇڭعىشباي اعامىزدى اقتاپ الۋدىڭ ءوزى قيىن بولىپ تۇر. ءبىراق، الەۋمەتتىك جەلىدە ەركىن كوسىلگەن جۇرت سۇيىكتى اكتەرلەرىن جاماناتقا قيماي، اراشا ءتۇسىپ جاتىر. بۇل ەندى حالىقتىڭ ويى، قوعامنىڭ پىكىرى.
كۇرەسكەر بولىپ قالىڭىز، تۇقا!
ءبىزدىڭ نازارىمىزدى اۋدارعان ءبىر ماسەلەنى ايتساق. تۇڭعىشباي جامانقۇلوۆ مادەنيەت سالاسىنىڭ اتقامىنەرلەرىمەن ايقاسقا تۇسكەندە بۇل داۋ ۋشىعىپ، لاۋلاعان وتتىڭ شالاسى ءوزىنىڭ قوراسىنا تۇسەتىنىن ويلاعان جوق.
كىم بىلەدى، اكتەر اعامىز وتكەن جازدا ورىن العان وقيعالارعا ارالاسپاعاندا مۇنداي پۇشايمان كۇيگە تۇسپەس پە ەدى. ءيا، «سەن تيمەسەڭ، مەن تيمەيمىن بادىراق كوز» دەگەن ادەپكى ۇستانىمدى ۇستاسا تۇقاڭ ءقازىر «فەنيكس» ءفيلمىنىڭ پرەمەراسىن وتكىزىپ، شاپقىلاپ جۇرەر ەدى عوي؟!
ول سول ءبىر وقيعاعا ارالاسقان ساتىندە مادەنيەتتىڭ اينالاسىندا جۇرگەن ءبىراز ادامدار (قاراپايىم حالىقپەن شاتاستىرماڭىزدار) قولداۋ ءبىلدىردى. ءبىراق، سوڭىنا دەيىن تۇقاڭنىڭ قولداۋشىسى بولا المادى. ال حالىق تۇقاڭ «فەنيكس» ءفيلمى بويىنشا ون جەردەن ايىپتى بولسا سۇيىكتى اكتەرلەرىن قولدايتىندارىن اشىق ايتۋدا.
جامانقۇلوۆ بىتپەس داۋعا ارالاسقاندا ءىستىڭ سوڭى قالاي اياقتالاتىنىن دۇرىس باعامداماعانى انىق. حان، بيلەردىڭ ءرولىن سومداپ، وپتيميزمگە بويى ابدەن ۇيرەنىپ العان تۇقاڭ جاعدايدىڭ ويلاماعان جەردەن كۇرت ۋشىعاتىنىن ەسەپكە الماسا كەرەك.
اكتەر جاعداي ۋشىققان جاعدايدا ءوزىن قالاي ۇستاۋ كەرەك ەكەنىن ويلاماعانى انىق. وعان ونىڭ «اعالاپ» پرەزيدەنتكە ءۇن قاتۋى ايقىن دالەل بولا الادى.
تۇقا، مۇندايدا بوركەمىك بولماڭىز. حالىقتىڭ ءوزى قولداپ وتىر ءسىزدى. سول «فەنيكس» فيلمىنەن جىرعاتىپ، قالتاعا قىرۋار اقشا باسپاعانىڭىزدى جۇرتتىڭ ءبارى بىلەدى. ەلىمىزدە تۇيەنى تۇگىمەن جۇتاتىن جەمقورلار تۇرعاندا سىزدىكى اشەيىن دۇنيە ەمەس پە؟ ءوزىڭىز ويناعان حان-بيلەردىڭ حاريزماسىن از دا بولسا بويىڭىزعا دارىتپاعانىڭىز قالاي؟
ءاليحان بوكەيحانوۆ ءوزىن «بارسا كەلمەستىڭ ساپارىنا» الىپ كەتۋگە كەلگەن ءۇش ءارىپتىڭ ادامدارى كەلگەندە قالاي قارسى الىپ، ولاردىڭ وكتەمدىگىن قالاي باسقانىن ۇمىتتىڭىز با؟ الاش ارداقتىسى ءاليحان ۇلت مۇددەسى جولىندا ءوزىنىڭ باسىن بايگەگە تىككەنىن ءبىلدى. ادىلەتتىلىك ءوز جاعىندا بولعاندىقتان اجالدىڭ ءوزىن دە ۇلكەن سابىرمەن قارسى الىپ، كەيىنگى ۇرپاققا ونەگە كورسەتتى ەمەس پە؟
ءسىز دە ءوز ادىلەتىڭىزدەن اينىماڭىز. ءاربىر ءىستىڭ سوڭىنا دەيىن كۇرەسكەر بولىپ قالىڭىز. كوپشىلىك ءسىزدى قولدايدى، تۇقا!
نۇرلان اۋباكىر
