اتىراۋ وبلىسىنىڭ يندەربور كەنتىندەگى ورتالىق ساياباققا دومبىرا مونۋمەنتى قويىلدى، دەپ حابارلايدى Dalanews.kz.
مونۋمەنتتە “ابدوللا دومبىراسى” دەگەن جازۋ بار.
ۇلتتىق دومبىرا كۇنى قارساڭىندا يندەر اۋدانىنىڭ ورتالىعى – يندەربور كەنتىندە دومبىرا مونۋمەنتى اشىلدى. اۋدان اكىمى دارىن شامۇراتوۆتىڭ ايتۋىنشا، التىن تۇستەس مەتاللدان قۇيىلعان مونۋمەنتتىڭ بيىكتىگى – 7،5 مەتر. ءبىر ەرەكشەلىگى دومبىرا مونۋمەنتى تۇنگى مەزگىلدە دە جارقىراپ تۇرادى.
“دومبىرا – سان عاسىردان بەرى ۇلتتىڭ رۋحىن بيىكتەتكەن، تالاي ۇرپاقتىڭ بەسىگىن تەربەپ، ەرلىك پەن ەلدىكتىڭ، ادالدىق پەن ادامدىقتىڭ كۇيىن شەرتكەن ۇلتتىق اسپابىمىز. قازاقتىڭ دومبىراسى ارقىلى ۇلتتىق مادەنيەتىمىزدى قالىپتاستىرعان اقىن-جىراۋلار، كۇيشى-دومبىراشىلار از ەمەس. دومبىرا مونۋمەنتىن اتىراۋ توپىراعىنان ءنار الىپ، كۇيشىلىك، سازگەرلىك ءداستۇردى جالعاستىرعان قازاق ءسسر-ىنىڭ ەڭبەك سىڭىرگەن مادەنيەت قىزمەتكەرى ابدوللا مۋساعالييەۆتىڭ ەسىمىمەن اتاۋدى ءجون كوردىك”، - دەيدى دارىن شامۇراتوۆ Inform.kz اگەنتتىگىنە بەرگەن سۇقباتىندا.
اكىمنىڭ ايتۋىنشا، دومبىرا مونۋمەنتىن اشۋ يدەياسىنىڭ استارىندا ەكى ماقسات بار. ءبىرىنشىسى – جاس ۇرپاققا ۇلتتىق قۇندىلىقتى ناسيحاتتاۋ. ال ەكىنشىسى – كۇيشىلىك ونەردى كەيىنگى بۋىنعا جەتكىزگەن ابدوللا مۋساعالييەۆ سەكىلدى ونەر ساڭلاقتارىنىڭ ەل جادىندا ساقتالۋىنا ىقپال ەتۋ.
“ابدوللا دومبىراسى” اتالعان مونۋمەنتكە جەرگىلىكتى ونەرپازدار ءادىل ەسقالييەۆ، ماجان ەسقازييەۆ، ماۋلەت قاراسايەۆ، ءتۇرعانالى ۇسەنعالييەۆ، قۋانىشقالي قاراقۇلوۆ، ءۇنزيرا ومىربايەۆا مەن قاناپيا ماحمەتوۆانىڭ ەسىمى قاشالىپ جازىلعان. ويتكەنى ولاردىڭ ءبارى 1958 جىلى قازاقستان ادەبيەتى مەن ونەرىنىڭ ماسكەۋدەگى ونكۇندىگىنە يندەر اۋدانىنان قاتىسقان.
دومبىرا مونۋمەنتى “ARSM” ءجشس-نىڭ باسشىسى ج.ءشارىپوۆتىڭ دەمەۋشىلىگىمەن ورناتىلعان. كاسىپكەر يگىلىكتى ىسكە 6 ملن تەڭگە بولگەن.
