قىتايدان قازاقستانعا وتە الماي جاتقان جۇك كولىكتەرىنىڭ جۇرگىزۋشىلەرى ەلدەگى كەدەن قىزمەتىنىڭ ءتيىستى جۇمىس ىستەمەي جاتقانىن ايتىپ، Dalanews.kz رەداكسياسىنا شاعىمدارىن جەتكىزدى.
جۇرگىزۋشىلەردىڭ سوزىنشە، قازىرگى كەزدە شەكارادان كۇنىنە تەك 150–170 كولىك وتكىزىلەدى. ال جۇڭگو تاراپىنان مىڭداعان جۇك كولىگىن وتكىزۋگە دايىن ەكەنى حابارلانعان.
“ءبىز جولدا ۇزاق ۋاقىت كۇتىپ قالدىق، كەيبىر جۇرگىزۋشىلەر ءتىپتى ۇيىقتاپ قالىپ جاتىر”،- دەيدى جۇك كولىگىنىڭ جۇرگىزۋشىسى.
قازىرگى تاڭدا جۇرگىزۋشىلەر جولداعى كەدەرگىلەردى ەسەپتەپ، ءار كولىكتىڭ ءوتۋىن قاداعالاپ وتىر. ولار اتالعان ماسەلەنى شەشۋ ءۇشىن كەدەن كوميتەتىنەن كومەك سۇرادى.
ەسكە سالايىق، بۇعان دەيىن مەملەكەت باسشىسى قاسىم-جومارت توقايەۆ شەكاراداعى جۇك كولىكتەرىنىڭ ۇزىن سونار كەزەگىن جويۋ قاجەت ەكەنىن جەتكىزگەن ەدى.
“ازاماتتاردىڭ ەركىن قوزعالۋىنا مۇمكىندىك بەرمەيتىن قولدان جاسالعان شەكتەۋلەردى الىپ تاستاپ، شەكاراداعى جۇك كولىكتەرىنىڭ ۇزىن سونار كەزەگىن جويۋ قاجەت. كەدەندىك رەتتەۋ جانە (كولىك، سانيتارلىق، ۆەتەرينارلىق، فيتوسانيتارلىق) مەملەكەتتىك قاداعالاۋ شارالارى ۇيىم ىشىندەگى كەيبىر شەشىمدەردى وتكىزۋ قۇرالى رەتىندە قولدانىلماۋعا ءتيىس. ەاەو قۇرىلعالى بەرى كەدەرگىسىز ساۋدا ورتاسىن قالىپتاستىرۋعا باعىتتالعان ءبىرشاما قۇجات قابىلداندى. ەندى وسى ورتاق مىندەتتەردى مۇلتىكسىز ساقتاپ، ءوزارا الىس-بەرىس پەن بارىس-كەلىسكە "تۇساۋ بولاتىن تۇيتكىلدەردى" ۋاقتىلى شەشىپ وتىرۋ كەرەك”، — دەدى ول.
ايتۋىنشا، كوميسسيا كەدەرگىلەردى شۇعىل انىقتاۋ ءۇشىن ەاەو-عا مۇشە مەملەكەتتەردىڭ زاڭنامالىق باستامالارىنا مونيتورينگ جۇرگىزەتىن جاساندى ينتەللەكت تەحنولوگياسىن قوسۋ مۇمكىندىگىن قاراستىرعانى ءجون.
“كەدەرگىسىز نارىق پەن تاۋارلاردىڭ ەركىن قوزعالىسىن قامتاماسىز ەتۋ باستى مىندەت بولۋعا ءتيىس. ازاماتتار مەن بيزنەس ينتەگراسيانىڭ ناقتى پايداسىن كورۋى كەرەك”، – دەدى مەملەكەت باسشىسى.
سونىمەن قاتار ول ساۋدا-ەكونوميكالىق ىنتىماقتاستىق اياسىن كەڭەيتۋدى بەلسەندى قولعا العان دۇرىس دەپ سانايدى.
“بيىل موڭعوليامەن ەركىن ساۋدا ايماعى تۋرالى كەلىسىمگە، بىرىككەن اراب امىرلىكتەرىمەن ەكونوميكالىق سەرىكتەستىك تۋرالى كەلىسىمگە قول قويىلدى. بۇگىن يندونەزيامەن وسىنداي مامىلە جاسالادى. ءبىز مۇنى قۇپتايمىز. بۇل – بىرلەسكەن جۇمىستىڭ ەلەۋلى ناتيجەسى. ءارى وزگە ەلدەردىڭ ەۋرازيالىق ەكونوميكالىق وداقپەن ساۋدا بايلانىستارىن تەرەڭدەتۋگە قىزىعۋشىلىعى ارتىپ كەلە جاتقانىن كورسەتەدى. تاياۋ كەلەشەكتە ەاەو-نىڭ جاھاندىق وڭتۇستىك، اراب ەلدەرىمەن، وڭتۇستىك-شىعىس ازيا جانە افريكا مەملەكەتتەرىمەن ىقپالداستىعىن كەڭەيتۋ ماڭىزدى دەپ سانايمىز. سونىمەن قاتار شىۇ، اسەان سەكىلدى باسقا دا ماڭىزدى ۇيىمدارمەن ىنتىماقتاستىققا ايرىقشا كوڭىل ءبولۋ كەرەك”، – دەدى پرەزيدەنت.
