حالىقارالىق باعدارلامالار ورتالىعىندا «بولاشاق» حالىقارالىق ستيپەنديياسىنا ٸرٸكتەۋ تەرتٸبٸنە ەنگٸزٸلەتٸن نەگٸزگٸ ٶزگەرٸستەر تانىستىرىلدى, دەپ حابارلايدى Dalanews.kz
ەندٸ كونكۋرس ەكٸ كەزەڭدٸ ٸرٸكتەۋ مەحانيزمٸ بويىنشا ٶتەدٸ. بٸرٸنشٸ كەزەڭدە بەلگٸلەنگەن ٶتۋ بالىن جيناعان ٷمٸتكەرلەر عانا ەكٸنشٸ تۋرعا جٸبەرٸلەدٸ. ورتالىقتىڭ مەلٸمەتٸنشە, 2025 جىلعى ٷش ٸرٸكتەۋ قورىتىندىسى بويىنشا بٸرٸنشٸ كەزەڭنەن ٶتە الماعان 131 ادام تٸركەلگەن. بۇل قابىلدانعان ٶتٸنٸمدەردٸڭ 5 پايىزىنا تەڭ.
سونىمەن قاتار, شەتەلدٸك جوعارى وقۋ ورىندارىنا قويىلاتىن تالاپتار كٷشەيتٸلدٸ. ەندٸ «بولاشاق» ستيپەنديياسى تەك QS University Rankings حالىقارالىق اكادەمييالىق رەيتينگٸنٸڭ «by subject» باعىتى بويىنشا ٷزدٸك 100 قاتارىنا كٸرەتٸن ۋنيۆەرسيتەتتەرگە بەرٸلەدٸ.
باعدارلامادا جاراتىلىستانۋ-تەحنيكالىق باعىتقا باسىمدىق ساقتالادى. بۇل باعىتتاعى ستيپەندييالاردىڭ ٷلەسٸ كەمٸندە 60 پايىزدى قۇراۋى تيٸس. ايتا كەتسەك, اتالعان كٶرسەتكٸش 2022 جىلى 59,2 پايىز بولسا, 2025 جىلى 69,6 پايىزعا دەيٸن ٶسكەن.
تاعى بٸر ماڭىزدى ٶزگەرٸس – باعدارلاما تٷلەكتەرٸنە ەڭبەك ٶتەۋدٸ حالىقارالىق جەنە ٶڭٸرلٸك ۇيىمداردا, اتاپ ايتقاندا بۇۇ, بۇۇدب, ەقىۇ, شىۇ جەنە ٶزگە دە ۇيىمداردا ٶتەۋگە رۇقسات بەرٸلدٸ.
سونىمەن بٸرگە, ورىس تٸلٸ مەملەكەتتٸك نەمەسە رەسمي تٸل بولىپ سانالمايتىن ەلدەردە ورىس تٸلٸندە بٸلٸم الۋ نەمەسە تاعىلىمدامادان ٶتۋ مٷمكٸندٸگٸ الىنىپ تاستالدى.
بۇدان بٶلەك, ٷمٸتكەرلەرگە كونكۋرسقا قايتا قاتىسۋعا مٷمكٸندٸك بەرٸلدٸ. ورتالىق دەرەگٸنشە, 2025 جىلى 2 600 ٶتٸنٸم قابىلدانعان. بۇل 2024 جىلمەن سالىستىرعاندا (1 893 ٶتٸنٸم) ايتارلىقتاي كٶپ.
