Halyqaralyq baǵdarlamalar ortalyǵynda «Bolashaq» halyqaralyq stipendiiasyna irikteý tártibine engiziletin negizgi ózgerister tanystyryldy, dep habarlaidy Dalanews.kz
Endi konkýrs eki kezeńdi irikteý mehanizmi boiynsha ótedi. Birinshi kezeńde belgilengen ótý balyn jinaǵan úmitkerler ǵana ekinshi týrǵa jiberiledi. Ortalyqtyń málimetinshe, 2025 jylǵy úsh irikteý qorytyndysy boiynsha birinshi kezeńnen óte almaǵan 131 adam tirkelgen. Bul qabyldanǵan ótinimderdiń 5 paiyzyna teń.
Sonymen qatar, sheteldik joǵary oqý oryndaryna qoiylatyn talaptar kúsheitildi. Endi «Bolashaq» stipendiiasy tek QS University Rankings halyqaralyq akademiialyq reitinginiń «by subject» baǵyty boiynsha úzdik 100 qataryna kiretin ýniversitetterge beriledi.
Baǵdarlamada jaratylystaný-tehnikalyq baǵytqa basymdyq saqtalady. Bul baǵyttaǵy stipendiialardyń úlesi keminde 60 paiyzdy quraýy tiis. Aita ketsek, atalǵan kórsetkish 2022 jyly 59,2 paiyz bolsa, 2025 jyly 69,6 paiyzǵa deiin ósken.
Taǵy bir mańyzdy ózgeris – baǵdarlama túlekterine eńbek óteýdi halyqaralyq jáne óńirlik uiymdarda, atap aitqanda BUU, BUUDB, EQYU, ShYU jáne ózge de uiymdarda óteýge ruqsat berildi.
Sonymen birge, orys tili memlekettik nemese resmi til bolyp sanalmaityn elderde orys tilinde bilim alý nemese taǵylymdamadan ótý múmkindigi alynyp tastaldy.
Budan bólek, úmitkerlerge konkýrsqa qaita qatysýǵa múmkindik berildi. Ortalyq dereginshe, 2025 jyly 2 600 ótinim qabyldanǵan. Bul 2024 jylmen salystyrǵanda (1 893 ótinim) aitarlyqtai kóp.
