سەنات مەديسينا قىزمەتكەرلەرى مەن جەدەل جاردەم جۇرگىزۋشىلەرىن قورعاۋعا باعىتتالعان زاڭ جوباسىن ەكى وقىلىمدا ماقۇلداپ، ونى پرەزيدەنتكە جولدادى. قۇجات دەنساۋلىق ساقتاۋ سالاسىنىڭ قىزمەتكەرلەرىنە قاتىستى زورلىق-زومبىلىق وقيعالارىنا توسقاۋىل قويۋدى جانە ولاردىڭ ەڭبەك قاۋىپسىزدىگىن كۇشەيتۋدى كوزدەيدى، دەپ حابارلايدى Dalanews.kz.
سەنات اتاپ وتكەندەي، زاڭنىڭ قابىلدانۋى مەديسينا قىزمەتكەرلەرى مەن جەدەل جاردەم كولىگىنىڭ جۇرگىزۋشىلەرىنە قۇقىقتىق قورعانىس بەرىپ قانا قويماي، ولاردىڭ كاسىبي مىندەتىن ءقاۋىپسىز ورتادا اتقارۋىنا مۇمكىندىك جاساپ، مەديسينالىق قىزمەت ساپاسىنا وڭ ىقپال ەتپەك.
جاڭا نورمالارعا سايكەس، قىلمىستىق كودەكس 380-3-باپپەن ( مەديسينا قىزمەتكەرىنە نەمەسە جەدەل جاردەم كولىگىنىڭ جۇرگىزۋشىسىنە كۇش قولدانۋ نەمەسە كۇش قولدانۋ قاتەرىن ءتوندىرۋ) تولىقتىرىلدى. ەندى مۇنداي ارەكەتتەر ءۇشىن جازا ەداۋىر قاتاڭداتىلدى.
اتاپ ايتقاندا، مەديسينا قىزمەتكەرىنە نەمەسە جەدەل جاردەم بريگاداسىنىڭ جۇرگىزۋشىسىنە كۇش قولدانامىن دەپ قورقىتقان ازاماتتارعا 200-دەن 500 ايلىق ەسەپتىك كورسەتكىشكە دەيىن ايىپپۇل، سول مولشەردە تۇزەۋ جۇمىستارى، 300 ساعاتقا دەيىن قوعامدىق جۇمىستار، نە ەكى جىلعا دەيىن باس بوستاندىعىن شەكتەۋ نەمەسە ايىرۋ جازاسى قاراستىرىلعان. اۋىرلاتاتىن ءمان-جايلاردا بۇل مەرزىم ەكى جىلدان ءۇش جىلعا دەيىن ۇلعايادى.
ءومىرى مەن دەنساۋلىعىنا ءقاۋىپتى ەمەس كۇش قولدانۋ فاكتىلەرى ءۇشىن 500-دەن 1000 اەك-كە دەيىن ايىپپۇل، 600 ساعاتقا دەيىن قوعامدىق جۇمىستار نەمەسە ەكى جىلدان ءۇش جىلعا دەيىن باس بوستاندىعىن شەكتەۋ نە ايىرۋ جازاسى قولدانىلادى. ال مۇنداي ارەكەت اۋىرلاتاتىن جاعدايلاردا جاسالسا، جازا ءۇش جىلدان جەتى جىلعا دەيىن قاتاڭداتىلادى.
ءومىرى مەن دەنساۋلىعىنا ءقاۋىپتى كۇش قولدانعاندار بەس جىلدان ون جىلعا دەيىن باس بوستاندىعىنان ايىرىلادى. اۋىرلاتاتىن ءمان-جايلار بولعان جاعدايدا بۇل مەرزىم جەتى جىلدان ون ەكى جىلعا دەيىن ۇزارتىلۋى مۇمكىن.
سەنات قابىلداعان زاڭ مەديسينا سالاسى قىزمەتكەرلەرىنىڭ قاۋىپسىزدىگىن قامتاماسىز ەتۋگە جانە ولاردىڭ مارتەبەسىن كۇشەيتۋگە باعىتتالعان ماڭىزدى قادام رەتىندە باعالانىپ وتىر.
