Senat meditsina qyzmetkerleri men jedel járdem júrgizýshilerin qorǵaýǵa baǵyttalǵan zań jobasyn eki oqylymda maquldap, ony Prezidentke joldady. Qujat densaýlyq saqtaý salasynyń qyzmetkerlerine qatysty zorlyq-zombylyq oqiǵalaryna tosqaýyl qoiýdy jáne olardyń eńbek qaýipsizdigin kúsheitýdi kózdeidi, dep habarlaidy Dalanews.kz.
Senat atap ótkendei, zańnyń qabyldanýy meditsina qyzmetkerleri men jedel járdem kóliginiń júrgizýshilerine quqyqtyq qorǵanys berip qana qoimai, olardyń kásibi mindetin qaýipsiz ortada atqarýyna múmkindik jasap, meditsinalyq qyzmet sapasyna oń yqpal etpek.
Jańa normalarǵa sáikes, Qylmystyq kodeks 380-3-bappen ( Meditsina qyzmetkerine nemese jedel járdem kóliginiń júrgizýshisine kúsh qoldaný nemese kúsh qoldaný qaterin tóndirý) tolyqtyryldy. Endi mundai áreketter úshin jaza edáýir qatańdatyldy.
Atap aitqanda, meditsina qyzmetkerine nemese jedel járdem brigadasynyń júrgizýshisine kúsh qoldanamyn dep qorqytqan azamattarǵa 200-den 500 ailyq eseptik kórsetkishke deiin aiyppul, sol mólsherde túzeý jumystary, 300 saǵatqa deiin qoǵamdyq jumystar, ne eki jylǵa deiin bas bostandyǵyn shekteý nemese aiyrý jazasy qarastyrylǵan. Aýyrlatatyn mán-jailarda bul merzim eki jyldan úsh jylǵa deiin ulǵaiady.
Ómiri men densaýlyǵyna qaýipti emes kúsh qoldaný faktileri úshin 500-den 1000 AEK-ke deiin aiyppul, 600 saǵatqa deiin qoǵamdyq jumystar nemese eki jyldan úsh jylǵa deiin bas bostandyǵyn shekteý ne aiyrý jazasy qoldanylady. Al mundai áreket aýyrlatatyn jaǵdailarda jasalsa, jaza úsh jyldan jeti jylǵa deiin qatańdatylady.
Ómiri men densaýlyǵyna qaýipti kúsh qoldanǵandar bes jyldan on jylǵa deiin bas bostandyǵynan aiyrylady. Aýyrlatatyn mán-jailar bolǵan jaǵdaida bul merzim jeti jyldan on eki jylǵa deiin uzartylýy múmkin.
Senat qabyldaǵan zań meditsina salasy qyzmetkerleriniń qaýipsizdigin qamtamasyz etýge jáne olardyń mártebesin kúsheitýge baǵyttalǵan mańyzdy qadam retinde baǵalanyp otyr.
