قاسىم-جومارت توقايەۆ باۋىرجان مومىشۇلىنا «حالىق قاھارمانى» اتاعىن بەرۋ تۋرالى شەشىم قابىلدادى. بۇل جايلى مەملەكەت باسشىسى جامبىل وبلىسىنىڭ جۇرتشىلىعىمەن كەزدەسۋدە مالىمدەدى، دەپ حابارلايدى Dalanews.kz.
«كەشە باۋىرجان مومىش ۇلىنىڭ تۋعانىنا 115 جىل تولدى. داڭقتى قولباسشىنىڭ ناعىز ەرلىك جولى ەلىمىزبەن قاتار، شەتەلدەردە وتە تانىمال. حالقىمىز ونى قاھارمان تۇلعا رەتىندە قۇرمەت تۇتادى. ءبىراق ايگىلى باتىرعا رەسمي تۇردە «حالىق قاھارمانى» اتاعى بەرىلمەگەن. وبلىس جۇرتشىلىعى، زيالى قاۋىم وكىلدەرى، ءتىپتى، جاستارىمىز دا وسى ماسەلەنى كوتەرىپ جۇرگەنىن بىلەمىز. تاريحي ادىلدىكتى قالپىنا كەلتىرۋىمىز كەرەك. سوندىقتان مەن مەملەكەت باسشىسى رەتىندە باۋىرجان مومىشۇلىنا «حالىق قاھارمانى» اتاعىن بەرۋ تۋرالى شەشىم قابىلدادىم. ءتيىستى جارلىققا بۇگىن قول قويدىم، بۇل قۇجات مىندەتتى تۇردە جاريالانادى. باتىردىڭ ەسىمى ناعىز وتانشىلدىق پەن وشپەس ەرلىكتىڭ سيمۆولى رەتىندە ءاردايىم كوپكە ۇلگى-ونەگە بولۋعا ءتيىس. باۋكەڭنىڭ ەرلىگى جاي اڭىز ەمەس، بۇل – ناقتى قۇجاتتارمەن دالەلدەنگەن، ۇلى وتان سوعىسىنا قاتىسقان باتىرلار مويىنداعان ءسوزسىز ەرلىك. ەلگە ەرلىگىمەن تانىلعان، ەڭبەگى سىڭگەن ازاماتتارىن باعالاي بىلگەن جۇرت ەشقاشان ۇتىلمايدى»، - دەدى توقايەۆ.
سونداي-اق پرەزيدەنت تارازدا جاڭادان اشىلعان اسكەري مەكتەپ-ينتەرناتقا باۋىرجان مومىش ۇلىنىڭ ەسىمىن بەرۋدى ۇسىندى.
«مەن بۇگىن تارازدا جاڭادان اشىلعان اسكەري مەكتەپ-ينتەرناتقا باردىم. بۇل – وڭتۇستىك ايماقتاردا اشىلعان وسىنداي العاشقى وقۋ ورنى. مەن مەكتەپ-ينتەرناتقا وسى ولكەنىڭ تۋماسى، ايگىلى باتىرىمىز باۋىرجان مومىش ۇلىنىڭ ەسىمىن بەرۋدى ۇسىنامىن. وسىنداي باۋىرجان مەكتەپتەرى بارلىق ايماقتا اشىلۋى كەرەك. ۇكىمەت بۇل ماسەلەنى پىسىقتايدى. ءبىز جاس ۇرپاققا ساپالى ءبىلىم بەرىپ، ولاردى وتانشىلدىققا تاربيەلەۋىمىز قاجەت»، - دەدى مەملەكەت باسشىسى.
