Qasym-Jomart Toqaev Baýyrjan Momyshulyna «Halyq qaharmany» ataǵyn berý týraly sheshim qabyldady. Bul jaily Memleket basshysy Jambyl oblysynyń jurtshylyǵymen kezdesýde málimdedi, dep habarlaidy Dalanews.kz.
«Keshe Baýyrjan Momyshulynyń týǵanyna 115 jyl toldy. Dańqty qolbasshynyń naǵyz erlik joly elimizben qatar, shetelderde óte tanymal. Halqymyz ony qaharman tulǵa retinde qurmet tutady. Biraq áigili batyrǵa resmi túrde «Halyq qaharmany» ataǵy berilmegen. Oblys jurtshylyǵy, ziialy qaýym ókilderi, tipti, jastarymyz da osy máseleni kóterip júrgenin bilemiz. Tarihi ádildikti qalpyna keltirýimiz kerek. Sondyqtan men Memleket basshysy retinde Baýyrjan Momyshulyna «Halyq qaharmany» ataǵyn berý týraly sheshim qabyldadym. Tiisti Jarlyqqa búgin qol qoidym, bul qujat mindetti túrde jariialanady. Batyrdyń esimi naǵyz otanshyldyq pen óshpes erliktiń simvoly retinde árdaiym kópke úlgi-ónege bolýǵa tiis. Baýkeńniń erligi jai ańyz emes, bul – naqty qujattarmen dáleldengen, Uly Otan soǵysyna qatysqan batyrlar moiyndaǵan sózsiz erlik. Elge erligimen tanylǵan, eńbegi sińgen azamattaryn baǵalai bilgen jurt eshqashan utylmaidy», - dedi Toqaev.
Sondai-aq Prezident Tarazda jańadan ashylǵan áskeri mektep-internatqa Baýyrjan Momyshulynyń esimin berýdi usyndy.
«Men búgin Tarazda jańadan ashylǵan áskeri mektep-internatqa bardym. Bul – ońtústik aimaqtarda ashylǵan osyndai alǵashqy oqý orny. Men mektep-internatqa osy ólkeniń týmasy, áigili batyrymyz Baýyrjan Momyshulynyń esimin berýdi usynamyn. Osyndai Baýyrjan mektepteri barlyq aimaqta ashylýy kerek. Úkimet bul máseleni pysyqtaidy. Biz jas urpaqqa sapaly bilim berip, olardy otanshyldyqqa tárbieleýimiz qajet», - dedi Memleket basshysy.
