Shymkentte keiingi jeti jyldaǵy jalpy óńirlik ónimniń eń joǵary ósimi tirkeldi. Bul qaladaǵy áleýmettik-ekonomikalyq damýdyń turaqty qarqynyn kórsetedi, dep habarlaidy dalanews.kz.
2025 jyldyń qorytyndysy boiynsha megapolistiń jalpy óńirlik ónimi 5,7 trln teńgege jetip, aldyńǵy kezeńmen salystyrǵanda 11%-ǵa artqan.
Bul kórsetkish respýblikalyq ortasha deńgeiden (6,5%) aitarlyqtai joǵary. Ekonomika kólemi boiynsha Shymkent óńirler arasynda ekinshi orynda, iaǵni Astanadan keiingi orynda tur.
Ekonomikanyń ósýine ónerkásip óndirisiniń damýy, jańa kásiporyndar ashylýy jáne óńdeý sektoryndaǵy investitsiialyq jobalar iske asýy eleýli úles qosty.
Sonymen qatar, qurylys salasy belsendi damýy, turǵyn úi qurylysy kóleminiń artýy, infraqurylymdyq jobalar júzege asýy jáne saýda ainalymy keńeiýi de oń dinamikaǵa áser etti.
Jalpy óńirlik ónim qurylymy negizgi salalar teńgerimdi damyp jatqanyn kórsetedi. Mysaly, ónerkásiptiń úlesi - 20%, saýdanyń úlesi - 25,5%.
Jalpy qala ekonomikasy senimdi ósim kórsetip otyr. Keiingi úsh jylda jalpy óńirlik ónim kólemi shamamen eki esege ósip, 2022 jylǵy 3,3 trln teńgeden 2025 jyly 5,7 trln teńgege jetti.
Shaǵyn jáne orta biznestiń róli de airyqsha atap ótiledi. Onyń JÓÓ qurylymyndaǵy úlesi 40,5%-dan 56%-ǵa deiin ósken. Bul kásipkerlik belsendilik artyp, ekonomikanyń jekemenshik sektory nyǵaiyp kele jatqanyn bildiredi.
Osylaisha, qol jetkizilgen kórsetkishter Shymkent ekonomikasynyń júieli damyp jatqanyn jáne onyń eldegi negizgi ekonomikalyq ortalyqtardyń biri retindegi pozitsiiasyn kúsheitkenin dáleldeidi.
