2023 jyldyń 24 aqpanynda Darkhan Juzz laqap atymen tanylǵan qazaqstandyq mýzykant Darhan Júnisbekov Tailandta jol apatynan qaza tapqan edi. Arada ýaqyt ótse de, óner iesiniń shyǵarmashylyǵy men aitqan sózderi jankúierleriniń jadynan óshken joq. Jelide ánshiniń tiri kezinde bergen suhbaty qaita tarap, kópshilikti tolqytty, dep habarlaidy dalanews.kz.
Atalǵan suhbatta mýzykant óziniń bolashaǵy týraly erekshe oi aitqan. Ol bir kezderi ómiri tym uzaqqa sozylmaityndai sezingenin, tipti 36-37 jasqa deiin ǵana ómir súretindei elestetkenin jetkizgen.
"Men ózimdi 36-37 jasqa deiin ǵana ómir súretindei elestetetinmin. Bir qaiǵyly jaǵdaidan kóz jumatyn siiaqtymyn. Áýeli tanymal bolamyn, sahnada jarqyraimyn, sodan keiin ǵaiyp bolamyn dep oilaitynmyn. Biraq ýaqyt óte kele bul oiymnan bas tarttym. Baqytty ómir súrgim keldi. Qartaiyp, nemerelerimdi kórgim keldi, jarqyn bolashaqqa sengim keldi", – degen edi mýzykant.
Video qaita jariialanǵannan keiin jeli qoldanýshylary túrli pikir jazdy. Keibiri bul sózderdi ánshiniń ishki sezimimen bailanystyrsa, endi biri taǵdyrdyń jazýy dep qabyldaǵan.
"Bárin júregimen sezgen eken", "Erte ketti", "Tiri bolǵanda talai biikti baǵyndyrar edi", "Jaqsy sóz aityp júrý kerek degen osy", – dep jazdy jankúierleri.
Eske salaiyq, Darkhan Juzz 33 jasynda Tailandta bolǵan jol apatynan kóz jumdy. Keiin Almatyda júzdegen adam Arbatqa jinalyp, marqumdy eske aldy. Jankúierleri gúl men sham ustap, onyń ánderin oryndap, óner iesiniń rýhyna taǵzym etken bolatyn.
Darhan Júnisbekovtiń eń tanymal ánderiniń biri – Erikpe. Qazir bul týyndyny ánshi YENLIK oryndap júr.
