الەۋمەتتىك جەلىدە اسكەري بورىشىن وتەۋگە بارعان ساربازدىڭ ءۇش ساۋساعىنان ايىرىلعانى تۋرالى اقپارات تارادى، دەپ حابارلايدى Dalanews.kz.
جابىرلەنۋشىنىڭ تۋىسى ماليكا ابدالييەۆانىڭ سوزىنشە، تۇڭعىشباي باعجان ەسىمدى ازامات اسكەري قىزمەت كەزىندە اۋىر جاراقات العان. سارباز 2025 جىلدىڭ جەلتوقسان ايىندا الماتىدا وقۋ-جاتتىعۋدان ءوتىپ، كەيىن وتار ماڭىنداعى اسكەري بولىمگە جىبەرىلگەن. قازىرگى ۋاقىتتا ول الماتى قالاسىنداعى حيرۋرگيا بولىمىندە ەم قابىلداپ جاتىر.
"ۇلكەن كەلىنىمنىڭ اعاسىنىڭ ۇلى اسكەرگە كەتكەن. الماتىدا وقۋ-جاتتىعۋدا بولىپ، جەلتوقسان ايىندا وتارعا اسكەري بورىشىن وتەۋگە بارعان. ءقازىر 10 كۇننەن بەرى الماتى قالالىق اۋرۋحاناسىنىڭ حيرۋرگيا بولىمىندە جاتىر. ءۇش ساۋساعىنان ايىرىلىپتى"، - دەپ جازدى ول.
سونداي-اق جازبادا جابىرلەنۋشىنىڭ جاقىندارىنىڭ جولداعان حاتتارى دا كورسەتىلگەن. وندا سارباز اسكەري قىزمەت بارىسىندا پسيحولوگيالىق قىسىمعا ۇشىراعانىن اشىق جەتكىزگەن.
"مەنى اكەتپەسەڭىز، تابىتىمدى اكەتەسىز"، - دەپ جازعان سارباز اكەسىنە.
اتالعان اقپارات قوعامدا رەزونانس تۋدىرعاننان كەيىن، Dalanews.kz رەداكسياسى جاعدايدى ناقتىلاۋ ماقساتىندا قورعانىس مينيسترلىگىنە رەسمي ساۋال جولدادى.
مينيسترلىكتىڭ بەرگەن جاۋابىنا سايكەس، وقيعا 2026 جىلى 6 قاڭتاردا گۆاردەيسك گارنيزونىندا ورنالاسقان اسكەري بولىمدەردىڭ بىرىندە بولعان. ۆەدومستۆو تاڭعى تەكسەرىس بارىسىندا اسكەري قىزمەتشى سول قولىنىڭ ساۋساقتارىن مەتالل زاتپەن جاراقاتتاپ العانىن مالىمدەدى.
"زارداپ شەككەن اسكەري قىزمەتشى شۇعىل تۇردە اسكەري گوسپيتالعا جەتكىزىلىپ، وعان ۋاقىتىلى مەديسينالىق كومەك كورسەتىلدى. قازىرگى ۋاقىتتا ونىڭ جاعدايى تۇراقتى، ءومىرى مەن دەنساۋلىعىنا ءقاۋىپ جوق. الماتىداعى ۇلتتىق عىلىمي حيرۋرگيا ورتالىعىندا ەم قابىلداپ جاتىر"، - دەپ مالىمدەدى مينيسترلىك.
سونىمەن قاتار ۆەدومستۆو الەۋمەتتىك جەلىدە تاراعان اقپاراتتى جوققا شىعاردى.
"زارداپ شەگۋشىنىڭ ايتۋىنشا، بۇل ارەكەت جەكە باس سەبەپتەرىنە بايلانىستى جاسالعان جانە اسكەري قىزمەتتى وتكەرۋمەن، سونداي-اق اسكەري ءبولىم كومانديرلەرىنىڭ نەمەسە لاۋازىمدى تۇلعالاردىڭ ارەكەتتەرىنە قاتىسى جوق. ياعني، الەۋمەتتىك جەلىدە تاراعانداي “تىكەلەي باسشىسىنىڭ ەسكەرتۋىنەن كەيىن جاراقات الىنعان” دەگەن اقپارات شىندىققا جاناسپايدى"، - دەدى ولار.
قازىرگى تاڭدا اتالعان دەرەك بويىنشا قىلمىستىق ءىس قوزعالعان.
"قازاقستان رەسپۋبليكاسى ىشكى ىستەر مينيسترلىگىنىڭ وڭتۇستىك وڭىرلىك اسكەري-تەرگەۋ باسقارماسىنىڭ گۆاردەيسك ءبولىمى وقيعانىڭ بارلىق ءمان-جايىن جان-جاقتى جانە وبەكتيۆتى انىقتاۋعا باعىتتالعان تەرگەۋ ءىس-شارالارىن جۇرگىزۋدە. جاعداي قۇرلىق اسكەرلەرى قولباسشىلىعىنىڭ باقىلاۋىندا"، - دەپ تۇيىندەدى مينيسترلىك.
