قازاقستان مەكتەپتەرىندە مەملەكەت ەسەبىنەن بەرىلەتىن تەگىن ىستىق تاماقتىڭ باسىم بولىگى قوقىسقا كەتىپ جاتىر. بۇل تۋرالى جۋرناليست ريشات اسقاربەك ۇلى ايتىپ، دابىل قاقتى، دەپ حابارلايدى Dalanews.kz.

ونىڭ ايتۋىنشا، اسحانالاردا دايىندالاتىن تاعامنىڭ 80–90 پايىزى جەلىنبەي، ءتىپتى مالعا بەرىلىپ وتىر. ياعني بيۋدجەتتەن بولىنگەن قارجى ناقتى بالاعا ەمەس، ىسىراپقا جۇمسالۋدا.

جۋرناليست بۇل جاعدايدى اشىق ابسۋرد دەپ باعالايدى. ونىڭ پىكىرىنشە، "تاعامتانۋ اكادەمياسى بەكىتكەن راسيون" دەگەن سىلتاۋمەن بالالار جەۋگە جارامسىز، ءدامسىز ءارى ساپاسىز تاماق بەرىلىپ وتىر.

نورماتيۆ بار، ءبىراق ناتيجە جوق

قازاقستاندا مەكتەپتەگى تاماقتانۋ جۇيەسى قاعاز جۇزىندە رەتتەلگەن. راسيوندى تاعامتانۋ اكادەمياسى بەكىتەدى، كالورياسى، قۇرامى، ۆيتامين مولشەرى ەسەپتەلەدى. ءبىراق ءىس جۇزىندە بۇل نورمالار بالانىڭ ناقتى تالعامى مەن فيزيولوگياسىنا ساي كەلە بەرمەيدى.

ريشات اسقاربەك ۇلى بالالارعا بەرىلەتىن اس كوبىنە سۋداي كومپوت، پىسپەگەن قىرىققابات، سۋىق تاماق تۇرىندە ۇسىنىلاتىنىن اتاپ ءوتتى. مۇنداي تاعامدى ەرەسەك ادامنىڭ ءوزى زورعا جەسە، باستاۋىش جانە ورتا سىنىپتاعى بالالاردىڭ جەمەي قويۋى زاڭدى.

ياعني پروبلەما تەك نورماتيۆادا ەمەس، ونى قالاي ورىنداپ جاتقانىندا.

ريشات اسقاربەك ۇلىنىڭ سوزىنشە، مەكتەپتەردە تاماقتاندىرۋ قىزمەتى تەندەر ارقىلى بەرىلەدى. بۇل جۇيەنى ءبارى بىلەدى، ءبىراق ەشكىم اشىق ايتپايدى:

كاسىپكەر ءۇشىن باستىسى – تەندەردى ۇتىپ الۋ. مەكتەپ ديرەكتورى ءۇشىن – ەسەپتىڭ دۇرىس جابىلۋى. ال مەملەكەت اقشاسى جەلىنبەگەن تاماقپەن بىرگە قوقىسقا كەتىپ جاتىر.

بۇل جەردە ساپا ەمەس، "قارجى يگەرۋ" باستى ماقساتقا اينالعان.

رەسمي ەسەپتە ءبىر بالا كۇنىنە بەلگىلى ءبىر سوماعا تاماق ىشكەن بولىپ سانالادى. ءبىراق بالا ونى جەمەسە دە، اقشا ءبارىبىر ەسەپتەن شىعادى. بۇل – جاسىرىن ىسىراپتىڭ ەڭ ءقاۋىپتى ءتۇرى.

ەگەر راسىمەن تاعامنىڭ 80–90 پايىزى جەلىنبەسە، وندا بۇل ميللياردتاعان تەڭگە ءتيىمسىز جۇمسالىپ جاتىر دەگەن ءسوز.

دەپۋتاتتار نەگە ءۇنسىز؟

جۋرناليست "قاشان تۇبەگەيلى شەشىم قابىلدايسىزدار؟" دەپ دەپۋتاتتارعا تىكەلەي سۇراق قويدى.

"كورىپ، كۇلىپ، جىلتىراپ كەتكەننەن نە پايدا، ەكاتەرينا سمولياكوۆا؟ ال ەندى ونى كوتەرىپ، ءبىر ۇلكەن بەتبۇرىس جاساۋ كەرەك نەمەسە ءدامدى، ادەمى قىلىپ جاساسا – بالا جەمەي مە؟!"، - دەيدى جۋرناليست.