Qazaqstan mektepterinde memleket esebinen beriletin tegin ystyq tamaqtyń basym bóligi qoqysqa ketip jatyr. Bul týraly jýrnalist Rishat Asqarbekuly aityp, dabyl qaqty, dep habarlaidy Dalanews.kz.
Onyń aitýynsha, ashanalarda daiyndalatyn taǵamnyń 80–90 paiyzy jelinbei, tipti malǵa berilip otyr. Iaǵni biýdjetten bólingen qarjy naqty balaǵa emes, ysyrapqa jumsalýda.
Jýrnalist bul jaǵdaidy ashyq absýrd dep baǵalaidy. Onyń pikirinshe, "Taǵamtaný akademiiasy bekitken ratsion" degen syltaýmen balalar jeýge jaramsyz, dámsiz ári sapasyz tamaq berilip otyr.
Normativ bar, biraq nátije joq
Qazaqstanda mekteptegi tamaqtaný júiesi qaǵaz júzinde rettelgen. Ratsiondy Taǵamtaný akademiiasy bekitedi, kaloriiasy, quramy, vitamin mólsheri esepteledi. Biraq is júzinde bul normalar balanyń naqty talǵamy men fiziologiiasyna sai kele bermeidi.
Rishat Asqarbekuly balalarǵa beriletin as kóbine sýdai kompot, pispegen qyryqqabat, sýyq tamaq túrinde usynylatynyn atap ótti. Mundai taǵamdy eresek adamnyń ózi zorǵa jese, bastaýysh jáne orta synyptaǵy balalardyń jemei qoiýy zańdy.
Iaǵni problema tek normativada emes, ony qalai oryndap jatqanynda.
Rishat Asqarbekulynyń sózinshe, mektepterde tamaqtandyrý qyzmeti tender arqyly beriledi. Bul júieni bári biledi, biraq eshkim ashyq aitpaidy:
Kásipker úshin bastysy – tenderdi utyp alý. Mektep direktory úshin – eseptiń durys jabylýy. Al memleket aqshasy jelinbegen tamaqpen birge qoqysqa ketip jatyr.
Bul jerde sapa emes, "qarjy igerý" basty maqsatqa ainalǵan.
Resmi esepte bir bala kúnine belgili bir somaǵa tamaq ishken bolyp sanalady. Biraq bala ony jemese de, aqsha báribir esepten shyǵady. Bul – jasyryn ysyraptyń eń qaýipti túri.
Eger rasymen taǵamnyń 80–90 paiyzy jelinbese, onda bul milliardtaǵan teńge tiimsiz jumsalyp jatyr degen sóz.
Depýtattar nege únsiz?
Jýrnalist "Qashan túbegeili sheshim qabyldaisyzdar?" dep depýtattarǵa tikelei suraq qoidy.
"Kórip, kúlip, jyltyrap ketkennen ne paida, Ekaterina Smoliakova? Al endi ony kóterip, bir úlken betburys jasaý kerek nemese dámdi, ádemi qylyp jasasa – bala jemei me?!", - deidi jýrnalist.
