استانادا ينتەرنەت ارقىلى الاياقتىق جاساعان 20 جاستاعى قالا تۇرعىنىنا ۇكىم شىقتى. ول تانىسۋعا ارنالعان Tinder قوسىمشاسىنا ايەل ادامنىڭ اتىمەن «نۇراي» دەپ تىركەلىپ، ءوزىنىڭ Telegram اككاۋنتىنا سىلتەمە قالدىرعان، دەپ حابارلايدى Dalanews.kz.
Telegram-دا بەيتانىس قىزدىڭ سۋرەتىن قويىپ، جالعان پاراقشا اشقان. سودان كەيىن جابىرلەنۋشىمەن تىلدەسىپ، كەزدەسۋگە ۋادە بەرىپ، ءارتۇرلى سىلتاۋلارمەن ودان اقشا سۇراي باستاعان.
قاسكويدىڭ ارام پيعىلىنان بەيحابار جابىرلەنۋشى ءۇش ايعا جەتپەيتىن ۋاقىت ىشىندە 4 ملن تەڭگەدەن استام قارجىسىن اۋدارعان.
سوت ايىپتالۋشىنى اقپاراتتىق جۇيە پايدالانۋشىسىنا قاتىستى ءىرى كولەمدە جاسالعان الاياقتىق ءۇشىن كىنالى دەپ تانىدى.
قىلمىستىق جاۋاپتىلىقتى جەڭىلدەتەتىن ءمان-جايلار - جاساعان ىسىنە شىن وكىنۋى، كەلتىرىلگەن مۇلىكتىك زالالدى ءوز ەركىمەن وتەۋى جانە اۋىرلاتاتىن ءمان-جايلاردىڭ بولماۋى ەسكەرىلە وتىرىپ، سوت ۇكىمىمەن وعان 3 جىل مەرزىمگە باس بوستاندىعىن شەكتەۋ جازاسى تاعايىندالىپ، پروباسيالىق باقىلاۋ بەلگىلەندى.
