الماتى قالاسىندا جوعارى وقۋ ورىندارى مەن ءبىلىم بەرۋ مەكەمەلەرىندە ءدىني ەكسترەميزم مەن تەرروريزمنىڭ الدىن الۋ تاقىرىبىندا ءاقپاراتتىق-تۇسىندىرۋ ءىس-شارالارى ءوتتى، دەپ حابارلايدى Dalanews.kz.
تەرروريزمگە قارسى كۇرەس تەك قازاقستاندا عانا ەمەس، بۇكىل الەمدە قاۋىپسىزدىك پەن تۇراقتىلىقتى قامتاماسىز ەتۋگە باعىتتالعان ماڭىزدى شارالاردىڭ ءبىرى بولىپ تابىلادى. تەرروريستىك اكتىلەردىڭ سالدارى بەيبىت تۇرعىندارعا، ەكونوميكا مەن قوعامنىڭ الەۋمەتتىك تۇراقتىلىعىنا زور زيان تيگىزەدى.
وسى باعىتتا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ تاريح جانە قۇقىق فاكۋلتەتىنىڭ وقىتۋشىسى نۇرلان ورىنبەكوۆ الماتى قالالىق ءاقپاراتتىق-تۇسىندىرۋ توبى مۇشەلەرىنە ارنالعان ەكى كۇندىك سەمينارعا قاتىستى. سەمينارعا الماتى قالاسى ءدىني ىستەر باسقارماسىنىڭ وكىلدەرى، ۇلتتىق قاۋىپسىزدىك كوميتەتى، تەرروريزمگە قارسى دايىندىق ورتالىعىنىڭ ماماندارى جانە بەلگىلى قوعام قايراتكەرلەرى قاتىسىپ، ءوز تاجىريبەلەرىمەن ءبولىستى.
شارا بارىسىندا قاتىسۋشىلارعا تەرروريزم اكتىسى ورىن العان نەمەسە ونىڭ ءقاۋپى تۋىنداعان جاعدايدا قانداي ءىس-قيمىل جاساۋ قاجەتتىگى ءتۇسىندىرىلدى. تۇركىسىب اۋداندىق ىشكى ىستەر باسقارماسىنىڭ قىزمەتكەرى قايىنباي داستان قانات ۇلى ارنايى ءدارىس وتكىزىپ، شۇعىل ەۆاكۋاسيا ءتارتىبى، كۇماندى زاتتارمەن جۇمىس ىستەۋ ەرەجەلەرى جانە جارىلعىش قۇرىلعى بەلگىلەرىن اجىراتۋ جولدارىن ەگجەي-تەگجەيلى باياندادى.
سونداي-اق، №1 الماتى قازاق مەملەكەتتىك گۋمانيتارلىق-پەداگوگتىك كوللەدجىنىڭ وقىتۋشىلارى مەن ستۋدەنتتەرى تەرروريزمنىڭ سەبەپتەرى مەن زارداپتارىن تالقىلاپ، ونىڭ الدىن الۋ باعىتىنداعى شارالاردىڭ ماڭىزىن اتاپ ءوتتى.
ال №178 مامانداندىرىلعان ليسەيدىڭ ۇجىمىنا الماتى قالاسى پوليسيا دەپارتامەنتىنىڭ ەكسترەميزم جانە تەرروريزمگە قارسى ءىس-قيمىل ءبولىمىنىڭ اعا لەيتەنانتى بەكتۇر ءابۋتالىپوۆ «تەرروريزم اكتىسىنىڭ ءقاۋپى تۋىنداعان جانە تەرروريزم اكتىسى جاسالعان جاعدايداعى ىس-ارەكەتتەر» تاقىرىبىندا ءدارىس وقىدى.
كەزدەسۋگە قاتىسقان ۇستازدار مەن ماماندار بالالار مەن جاستار اراسىندا ءدىني راديكاليزمنىڭ الدىن الۋ ءۇشىن ءتۇسىندىرۋ جۇمىستارىن جۇيەلى تۇردە جۇرگىزۋدىڭ ماڭىزدىلىعىن اتاپ ءوتتى.
مامانداردىڭ پىكىرىنشە، ەكسترەميزم مەن تەرروريزمنىڭ الدىن الۋ — تەك مەملەكەتتىك قۇرىلىمداردىڭ ەمەس، سونىمەن بىرگە ءاربىر ازاماتتىڭ، اتا-انانىڭ جانە پەداگوگتىڭ ورتاق مىندەتى.
