الماتىدا 16 قاڭتار كۇنى تاڭعى ساعات 07:00-دە جاۋا باستاعان قار 18 قاڭتار كۇنى ساعات 04:00-گە دەيىن تولاستاماي، وسى ارالىقتا شاھار اۋماعىنا 18 سانتيمەتر قار ءتۇستى. 23 قاڭتار كۇنى تۇنگى ساعات 01:30-دان باستاپ قالادا قار قايتا جاۋا باستادى. ول 23:00-گە دەيىن جالعاسادى دەپ بولجانىپ وتىر. كەشكى ساعات 20:00-دەگى مالىمەتكە سايكەس الماتىدا 8 سانتيمەتر قار تۇسكەن، دەپ حابارلايدى Dalanews.kz.

قالانىڭ قالىپتى تىرشىلىك ىرعاعىن ساقتاپ، كولىك قوزعالىسىنىڭ ءقاۋىپسىز ءارى ۇزدىكسىز ءجۇرۋىن قامتاماسىز ەتۋ، سونداي-اق، قولايسىز اۋا رايىنىڭ سالدارىن بارىنشا ازايتۋ ماقساتىندا كوممۋنالدىق قىزمەت كوشەلەردى قارداە ارىلتۋ جۇمىستارىن كۇشەيتىلگەن رەجيمدە جۇرگىزىپ جاتىر.

16 قاڭتاردان بەرى جول بويىنا، قيىلىستارعا، ەڭىس پەن ورگە، جولايىرىقتارىنا تايعاققا قارسى ارنايى قوسپا سەبۋ جۇمىستارى جالعاسىپ كەلەدى.

وسى ۋاقىت ارالىعىندا قالانىڭ ماگيسترالدىق كوشەلەرىنەن، قالالىق ماڭىزى بار جولدار مەن جولايىرىقتاردان 105 مىڭ تەكشە مەتر قار شىعارىلدى.

23 قاڭتار كۇنى كۇندىز قالا كوشەلەرىن قار قۇرساۋىنان ارىلتۋعا 75 جەدەل بريگادا، 2 479 جول سالاسى جۇمىسشىسى جانە 923 بىرلىك ارنايى تەحنيكا جۇمىلدىرىلدى. ونىڭ ىشىندە "الماتى تازالىق" مكك-نىڭ 1 769 قىزمەتكەرى مەن 649 تەحنيكاسى، سونداي-اق، جەكە مەردىگەر ۇيىمداردىڭ 710 جۇمىسشىسى مەن 274 تەحنيكاسى بار.

جول جيەگى مەن وعان ىرگەلەس اۋماقتاردا قاردى جيناۋ، سىپىرۋ، قاردى ءبىر جەرگە ءۇيىپ جيناۋ جۇمىستارى جۇرگىزىلىپ، 2 800 توننا تايعاققا قارسى ماتەريال سەبىلدى، سونداي-اق 5 220 تەكشە مەتر قار قالا اۋماعىنان شىعارىلدى.

23 قاڭتاردان 24 قاڭتارعا قاراعان ءتۇنى دە جۇمىستار ءبىر ساتكە تولاستاعان جوق. بۇل ۋاقىتتا 851 جول سالاسى جۇمىسشىسى ("الماتى تازالىق" مكك – 556 ادام، جەكە مەردىگەرلەر – 295 ادام) مەن 631 بىرلىك ارنايى تەحنيكا ("الماتى تازالىق" مكك – 476 بىرلىك، جەكە مەردىگەرلەر – 155 بىرلىك) قالا كوشەلەرىن تازالاۋعا تارتىلدى.

قالا كوشەلەرىن تازالاۋ بارىسى تاۋلىك بويى قاتاڭ باقىلاۋدا. وسى ماقساتتا الماتىنىڭ 24 ۋچاسكەسىندە مەردىگەر ۇيىمداردىڭ تەحنيكاسى مەن جۇمىسشى بريگادالارى قار شىعارۋ جۇمىستارىن ۇزدىكسىز جالعاستىرىپ وتىر.

قازىرگى تاڭدا بارلىق مەردىگەر ۇيىم كۇشەيتىلگەن جۇمىس تارتىبىنە كوشىرىلىپ، كوشە بويىن تازالاۋ جۇمىستارى تاۋلىك بويى توقتاۋسىز جالعاسىپ كەلەدى.