بۇگىن وبلىس اكىمى نۇرلىبەك نالىبايەۆ، ق ر پارلامەنتى سەناتىنىڭ دەپۋتاتى ناۋرىزباي بايقاداموۆ، وبلىس پروكۋرورى ريزابەك وجاروۆ پەن وبلىستىق ءماسليحاتتىڭ ءتوراعاسى مۇرات تلەۋمبەتوۆ، «پەترو قازاقستان قۇمكول رەسورسيز» اق ۆيسە-پرەزيدەنتى سەرىك قوجانيازوۆ ارال اۋداندىق اۋرۋحاناسىنا جاپسارلاس سالىنعان 51 توسەكتىك عيماراتتى كورىپ، جۇمىسىمەن تانىستى.
عيمارات قۇرىلىسىن «ۇلت ساۋلىعىن نىعايتۋ» ۇلتتىق باستاماسى اياسىندا قايتارىلعان اكتيۆتەر ەسەبىنەن بولىنگەن 2،3 ملرد تەڭگە قارجىعا «يمان» سەرىكتەستىگى سالدى. جاڭا نىساندا 17 توسەكتىك نەيرو-ينسۋلت جانە 34 توسەكتىك كارديولوگيا بولىمشەلەرى جۇمىس ىستەيدى.
الداعى ۋاقىتتا ورتالىقتى زاماناۋي مەديسينالىق قۇرال-جابدىقتارمەن، اتاپ ايتقاندا،ماگنيتتىك-رەزونانستىق توموگرافيا جانە انگيوگراف قوندىرعىلارىمەن جابدىقتاۋ جوسپارلانعان. بۇل بولىمشەلەر اۋدان تۇرعىندارىنىڭ اقتوبە جانە قىزىلوردا قالالارىنا بارماي-اق، جەرگىلىكتى جەردە جوعارى دەڭگەيلى مەديسينالىق تەكسەرۋدەن وتۋىنە، ەم الۋىنا مۇمكىندىك بەرەدى.
ايتا كەتەيىك، ارال اۋدانىنداعىينفراقۇرىلىمدىق جوبالارعا جانە الەۋمەتتىك نىساندار سالۋعا بيۋدجەتتەن 38 ملرد 740 ملن تەڭگە قارجى ءبولىندى. «كەلەشەك مەكتەبى»، «رۋحانيات ورتالىعى»، «قامقورلىق» وڭالتۋ ورتالىعى، 150 پاتەرلىك 75 تۇرعىن ءۇي، تەمىرجول ۇستىنەن وتەتىن كوپىر پايدالانۋعا بەرىلدى.
سەكسەۋىل كەنتى تابيعي گاز جەلىسىنە قوسىلىپ، مۇندا دا 300 ورىندىق «كەلەشەك مەكتەبى» مەن 40 توسەكتىك اۋرۋحانا ىسكە قوسىلدى. توقاباي اۋىلىندا جاڭا دارىگەرلىك امبۋلاتوريا، دەمەۋشىلەردىڭ قولداۋىمەن اپاتتى جاعدايداعى مەكتەپتىڭ ورنىنا 500 ملن تەڭگەگەجاڭا ءبىلىم وشاعى سالىندى. جاقىندا ەلدى مەكەن تازا اۋىز سۋمەن قامتىلدى.
اقشاتاۋ اۋىلىندا 60 ورىندىق جاڭا مەكتەپشاكىرتتەرىن قابىلدادى. اقباستى، ەرىمبەتجاعا جانە تاستۇبەك اۋىلدارىنا ورتالىقتاندىرىلعان اۋىز سۋ جەلىسى تارتىلدى. ال اباي اۋىلى تۇرعىندارىن اۋىز سۋمەن قامتاماسىز ەتۋ جۇمىستارى جاقىن كۇندەرى تولىق اياقتالادى.
شيجاعا ەلدى مەكەنىنە دە تابيعي گاز كەلدى،قامىستىباس اۋىلىندا 6 ملرد 300 ملن تەڭگە قارجىعا اۆتوماتتاندىرىلعان گاز تاراتۋ ستانساسى ىسكە قوسىلدى. اتالعان ستانسا ارقىلى ارال اۋدانىنا قاراستى 18 ەلدى مەكەندەگى 15 مىڭعا جۋىق تۇرعىندى كوگىلدىر وتىنمەن قامتۋعا مۇمكىندىك بار.
جىل باسىندا مەرگەنساي اۋىلىندا قۇرىلىسىنا 2 ملرد 333 ملن تەڭگە قارجى بولىنگەن 150 ورىندىق جاڭا مەكتەپ پايدالانۋعا بەرىلدى. بۇدان بولەك، «قازاقستان تەمىر جولى» ۇلتتىق كومپانياسىنىڭ قولداۋىمەن اۋدان اۋماعىنداعى تەمىرجول ۆوكزالدارىنا كۇردەلى جوندەۋ جۇمىستارى جۇرگىزىلۋدە.
