بوكسشى سەرىك ساپييەۆ داۋلى وقيعاعا بايلانىستى مالىمدەمە جاسادى، دەپ حابارلايدى Dalanews.kz.
بۇل تۋرالى ول جەلىدەگى پاراقشاسىندا جازدى.
"الەۋمەتتىك جەلىلەر مەن بۇقارالىق اقپارات قۇرالدارىندا تاراپ جاتقان جاعدايعا بايلانىستى كەلەسىنى اتاپ وتكىم كەلەدى. مەن مەملەكەتتىك قىزمەتشى رەتىندە ءوز مىندەتتەرىمدى اتقارۋ بارىسىندا مەملەكەتتىك قىزمەتشىنىڭ ادەپ قاعيداتتارىن قاتاڭ ساقتايمىن. بالا كەزىمنەن باپكەرلەرىم ماعان رينگتەن تىس جەردە كۇش قولدانۋعا بولمايتىنىن ۇيرەتتى. ءوز مۇمكىندىگىمدى جاقسى باعالايمىن جانە ءاربىر ىس-ارەكەتىم ءۇشىن جاۋاپكەرشىلىك ارقالايتىنىمدى تولىق تۇسىنەمىن. سوندىقتان قانداي دا ءبىر ارانداتۋشىلىقتارعا ەرمەيمىن. ماسەلە تولىق قارالىپ، جابىق دەپ ەسەپتەلەدى"، - دەدى ول.
ايتا كەتەيىك، بۇعان دەيىن قاراعاندى قالاسىنىڭ 42 جاستاعى تۇرعىنىنىڭ ارىزى نەگىزىندە ۇرىپ-سوعۋ دەرەگى بويىنشا قىلمىستىق ءىس قوزعالعان ەدى.
"21 قاڭتاردا قالاداعى سپورت كەشەندەرىنىڭ بىرىندە ەكى ەر ادام اراسىندا جانجال تۋىنداعان. ءقازىر پوليسيا قىزمەتكەرلەرى بولعان وقيعانىڭ بارلىق ءمان-جايىن انىقتاپ جاتىر"، - دەدى قاراعاندى وبلىسى پوليسيا دەپارتامەنتىنىڭ باسپا ءسوز قىزمەتى وكىلى.
