ەگەر بىزدە ساۋدالاناتىن قىمبات ۆاليۋتا ەۆرو مەن اقش دوللارى دەسەڭىزدەر، قاتتى جاڭىلىساسىزدار. الەمدەگى ەڭ قىمبات ۆاليۋتا – كۋۆەيت دينارى، نەگىزى. ق ر ۇلتتىق بانكتىڭ بۇگىنگە، 16 قاڭتاردا بەكىتكەن رەسمي باعامى بويىنشا 1 كۋۆەيت دينارىنىڭ قۇنى 1717،13 تەڭگە بولىپ تابىلادى، دەپ جازادى Dalanews.kz.
قازىرگى ساۋداداعى باعام، ءتىپتى 1721 تەڭگەدەن استى. قازاقستان ۆاليۋتا نارىعىنداعى كۋۆەيت دينارىنىڭ ءبىر اي بويعى كۇيىنە نازار سالساق، 16 قاڭتاردا ول ءوزىنىڭ ەڭ جوعارى شەگىن يگەرگەن ەكەن. ماسەلەن، 2024 جىلى جەلتوقسان ايىنىڭ ورتاسىندا بەرەكەسى قاشقان 1 كۋۆەيت دينارىنىڭ قۇنى 1700 تەڭگەدەن 1640 تەڭگەگە دەيىن كۇرت تومەندەگەن. ءبىراق ءبىر اپتادان سوڭ، ياعني 24 جەلتوقساندا باسىن اقىرىن تىكتەگەن ول بۇگىنگە دەيىن ۇستىنە تيىنداپ باعا قوسىپ، بىلتىرعى جوعارى شەگىنەن دە اسىپ وتىر.
ال كۋۆەيت دينارى مۇنشالىقتى نەگە قۇندى؟ ويتكەنى ول الەمدەگى №1 ەڭ قۇندى ءارى جاس ۆاليۋتا بولىپ تابىلادى. حالقىنىڭ ءاربىر ونىنشى تۇرعىنى ميلليونەر بولىپ سانالاتىن كۋۆەيتتە سالىق دەگەن مۇلدە اتىمەن جوق. جەر كولەمى كىشكەنتاي، جەر استى بايلىعى مول كۋۆەيت بۇگىندەرى الەمدى مۇناي ونىمدەرىمەن قامسىزداندىرىپ، كوپ تابىسقا كەڭەلۋدە. جوعارى دامىعان ەلدەر قاتارىنا جاتاتىن كۋۆەيتتىڭ ەكونوميكاسى ءارتاراپتاندىرىلعان. سوندىقتان وندا بيزنەس جۇرگىزۋ ءتيىمدى ءارى وڭتايلى. ءتۇرلى سالانى قامتيتىن شوب تا جاقسى دامىعان. جۇمىسسىزدىق دەگەن ماسەلە دە جوق. كۋۆەيت دينارى بىرنەشە شەتەل ۆاليۋتاسىنا بايلانعان، ول دا ونىڭ تۇراقتىلىعىن قامتاماسىز ەتەدى.
كۋۆەيت - وپەك-تەگى باستى مەملەكەتتەردىڭ ءبىرى. وسى ماڭدا قازاقستانمەن مۇددەلەرى تۇيىسەدى. ق ر ءسىم مالىمەتىنشە، 2023 جىلى قازاقستان مەن كۋۆەيت اراسىنداعى تاۋار اينالىم كولەمى 3،6 ملن دوللاردى قۇراعان. ال قازاقستاندىق ەكسپورت كولەمى 2،9 ملن دوللاردى قامتيدى. قازاقستان ءۇشىن كۋۆەيت اراب الەمىندەگى ماڭىزدى سەرىكتەستەرىنىڭ ءبىرى بولىپ تابىلادى. اراب ينۆەستورلارى ەلىمىزدىڭ اۋىلشارۋاشىلىعى، مۇناي-گاز، دەنساۋلىق ساقتاۋ سالالارىنا ءالى دە ينۆەستيسيا سالۋعا نيەتتى.
