Қазақстан–Қытай шекарасында жүздеген ауыр жүк көлігі сағаттап созылған ұзын-сонар кезекте тұр. Бұл тек Қытай Халық Республикасы тарапынан жүргізілетін баяу рәсімдерге емес, сонымен қатар, тасымалдаушылардың әрекетіне де байланысты болып отыр, – деп хабарлайды Dalanews.kz.
Қаржы министрлігіне қарасты Мемлекеттік кірістер комитетінің түсіндіруінше, шекарадағы кептелістің негізгі себебі - жүргізушілердің электрон кезек жүйесі белгілеген уақыттан бұрын келуі. Жүргізушілер өздеріне бөлінген уақытты ескермей, шекара бекеттеріне ерте жетеді. Соның салдарынан көліктер үйіліп қалады, тіпті 2023 жылдың 1 шілдесінен іске қосылған жаңа цифрлық жүйенің өзі мұншама жүктемені көтере алмай жатыр.
Жағдайды Қытай тарапынан жүк өткізудің бәсеңдеуі де ушықтырып тұр. Жергілікті билік жол мен инфрақұрылымды, әсіресе, тексеру кешендерін жөндеп жатқандықтан, өткізу жылдамдығы төмендеп кеткен. Оның үстіне Қытайда дәл қазір маусымдық қарбалас кезең: мерекелік уақыттарда тасымалдау көлемі әдеттегіден де өседі.
Қазақстанның Мемлекеттік кірістер комитеті Қытай тарапымен белсенді диалог жүріп жатқанын, рәсімдерді жеделдету мен өткізу қабілетін арттыру жолдары қарастырылып жатқанын мәлімдеді.
Шенеуніктер келіссөз жүргізіп жатқанда, шекарадағы жағдай әлі де күрделі болып тұр. Тасымалдаушыларға тәртіпті ұстанып, логистиканы өздері күрделендірмеуден басқа амал қалмай тұр.
Қытаймен шекарадағы мұндай жағдай бұрын да болған.
Қаңтарда Қазақстан мен Қытай арасында үшінші теміржол өткізу пунктін ашу жоспарланғаны хабарланған еді.
