2025 жылдың ақпан айында Қазақстанда жылдық инфляция үдеп, 9,4% болды (қаңтарда – 8,9%). Жылдық инфляция 15 өңірде жеделдеді, ал үш өңірде, керісінше баяулап, екі өңірде өзгеріссіз қалды. Бұл туралы ҚР Ұлттық Банктің баспасөз қызметі хабарлады, деп жазады Dalanews.kz.
Жылдық инфляцияның ең жоғары мәні Астана қаласында тіркелді.
Ақпанда азық-түлік тауарларының бағасы ж/ж 6,5%-ға дейін жеделдеді (қаңтарда – 5,8%). Осы топтағы тауарлардың бағасы Ақмола облысында (8,9%) барынша жоғары, ал Түркістан облысында (4,5%) мейілінше төмен қарқынмен өсті.
Ақпанда азық-түлікке жатпайтын тауарлар бағасының өсу қарқыны 8,7%-ға дейін жеделдеді (қаңтарда – 8,4%). Ең жоғары мән Түркістан облысында (14,1%), ең төменгі мән Павлодар облысында (5,8%) тіркелді.
Ақпанда ақылы көрсетілетін қызмет бағасы ж/ж 14,1%-ға дейін жеделдеді (қаңтарда – 13,8%). Сонымен қатар, Батыс Қазақстан облысында (19,2%) баға жалпы республикалық деңгейден жоғары, Түркістан облысында (8,4%) айтарлықтай төмен өсті.
Ақпанда айлық инфляция ел көлемінде 1,5%-ға өсті.
Бұған дейін сайтымызда қаржы саласы мамандарының ауыздықтауға келмей жатқан инфляция жайына қатысты айтыс-тартысы жарияланған. Алдымен Ұлттық Банк төрағасының кеңесшісі Сәбит Хәкімжанов базалық мөлшерлеменің инфляцияға әсері шектеулі деген сарапшылар қауымы ортасындағы пікірге уәж айтса, іле-шала экономист Ғалым Құсайынов базалық мөлшерлеменің өз функциясын неге орындай алмай жатқанын жіліктеп шағып, түсіндірді. Оның айтуынша, дәл қазір инфляциямен күрестің кешенді шараларын қабылдау керек. Оның ішінде мемлекеттік бюджетті, квазимемлекеттік компаниялар мен қорларды қоса алғанда, бюджет саясатын кешенді түрде қайта қарау да ұсынылады. Экономист Асқар Қысықов та мемлекеттік нысандарды жекеге беріп, барынша үнемге көшіп жатқан Қазақстан бюджетінде экономика салаларын қолдауға қомақты қаражат бағытталып жатқанына аң-таң. Мәселен, соның ішінде "Бәйтерек" холдингі арқылы шамамен 8 трлн теңге бөлу жайы қарастырылған. Ол да осы бағытта бюджетті "қырқу" керек деп санайды.
