Америкалық Forbes басылымы дәстүрлі Forbes World’s Billionaires жаһандық миллиардерлер рейтингін жариялады, деп хабарлайды Dalanews.kz.
2025 жылы Forbes нұсқасы бойынша әлемнің ең бай адамдарының қатарына жеті қазақстандық кәсіпкер енді: Вячеслав Ким, Михаил Ломтадзе, Тимур Турлов, Владимир Ким, Тимур және Динара Құлыбаевтар, сондай-ақ Болат Өтемұратов.
Қазақстандағы ең бай бизнесмен атағы 2025 жылы Вячеслав Кимге тиесілі болды. Kaspi.kz акционері және директорлар кеңесінің төрағасының байлығын Forbes 7,1 млрд долларға бағалады (былтыр 5,8 млрд доллар болған). Ол 2024 жылы 511-орыннан биыл 464-орынға көтерілді.
Оның серіктесі, Грузия азаматы Михаил Ломтадзе Қазақстан миллиардерлері арасында екінші орында тұр және Forbes-тың әлемдік рейтингінде 597-орынға жайғасты. Оның байлығы биыл 5,9 млрд доллар деп бағаланды (2024 жылы – 5,2 млрд доллар, 581-орын).
Freedom Holding негізін қалаушы Тимур Турлов өткен жылы қазақстандық миллиардерлер арасында бесінші орында болса, биыл үшінші орынға көтерілді. Оның байлығы бір жыл ішінде 3,3 млрд доллардан 5,8 млрд долларға дейін артты. Forbes рейтингінде 991-орыннан 605-орынға көтерілді.
Төртінші орында – KAZ Minerals және Қазақмыс акционері Владимир Ким. Оның байлығы 5,7 млрд доллар деп бағаланып отыр (былтыр – 3,6 млрд доллар). Forbes рейтингінде ол 896-орыннан 620-орынға көтерілді.
Бесінші және алтыншы орындарға «Алмэкс» холдингтік тобының жетекшісі және тең иесі Тимур Құлыбаев пен оның жұбайы Динара Құлыбаева жайғасты. 2025 жылы жаһандық рейтингте олар 673-орынды иеленсе (былтыр – 612-орын), әрқайсысының байлығы 5,3 млрд доллар деп бағаланды (2024 жылы – 5 млрд доллар).
ForteBank акционері Болат Өтемұратов қазақстандық миллиардерлер арасында жетінші орынға тұрақтады. Оның байлығы 2,7 млрд доллардан 3,7 млрд долларға дейін өсті. Forbes рейтингінде ол 1238-орыннан 979-орынға көтерілді.
Қазақстандық миллиардерлердің жалпы байлығы 2025 жылы 38,8 млрд доллар деп бағаланды (2024 жылы – 25,4 млрд доллар).
Әлемдегі ең бай адамдар кімдер?
Forbes рейтингінің көшін Tesla және SpaceX иесі Илон Маск бастады. Оның байлығы 342 млрд долларды құрап, бір жылда 147 млрд долларға артты.
Былтыр көш бастаған, Louis Vuitton Moët Hennessy тобының президенті және бас директоры Бернар Арно биыл бесінші орынға түсті. Оның байлығы бір жылда 55 млрд долларға азайып, 178 млрд долларды құрады.
Meta (бұрынғы Facebook) негізін қалаушы Марк Цукерберг төртінші орыннан екінші орынғакөтеріліп, оның байлығы 216 млрд доллар деп бағаланды (2024 жылы – 177 млрд доллар).
Үшінші орында Amazon басшысы Джефф Безос, оның байлығы 215 млрд долларды құрады.
Forbes World’s Billionaires рейтингі бойынша әлемнің ең бай 20 адамының жалпы байлығы 2,8 трлн долларды құрайды.
