Таразда 1993 жылы шығарылған Mercedes-Benz S600 көлігі сатылымға шығарылды. Оның бұрынғы иесі – Қазақстанның тұңғыш президенті Нұрсұлтан Назарбаев екені белігілі болды, деп хабарлайды Dalanews.kz.

NegeAqsha телеграм арнасының мәліметінше, көліктің бағасы – 222 миллион теңге.

“Бұл эксклюзивті алғашқы автомобиль – Тұңғыш Президенттің PK Mercedes 600 SEL (Sonderschutz) GUARD B7. Нағыз антиквариат және еліміздің тарихы!” – делінген хабарландыруда.

Сатушының айтуынша, көлік Германияда арнайы тапсырыс бойынша құрастырылған. Оның тек сырты емес, асты да 4 кг тротилге дейінгі жарылысты көтере алатын толыққанды фабрикалық бронекапсуламен жабдықталған. Автомобиль Калашников автоматын және снайперлік мылтықтардың оқтарын да қабылдай алады.

Дәлел ретінде сатушы архивтік фотосуреттер мен көлікті тіркеу куәлігін жариялаған.

ORDA тілшілері автокөлік иесімен байланысып, оның көліктің шынымен де Назарбаевқа тиесілі екенін және барлық құжаттары бар екенін растағанын хабарлады.