Алматы әкімі Ерболат Досаев әл-Фараби атындағы Қазақ ұлттық университеті (ҚазҰУ) базасында жоғары технологиялық жобалар мен стартаптарды дамытуға арналған «Farabi Hub» жаңа ғимаратында өткен «Ғылым, бизнес және өндіріс интеграциясы» форумына қатысты, деп хабарлайды Dalanews.kz
Форум алаңында бірлескен инновациялық жобаларға мүдделі бизнес, ғылым және мемлекеттік органдардың өкілдері жиналды. Форум басталар алдында қала басшысы Ерболат Досаев пен ҚазҰУ басқарма төрағасы – ректоры Жансейіт Түймебаев «Farabi Hub» инновациялық өнімдер мен жоғары технологиялық жобалар орталығын аралап, алдыңғы қатарлы әзірлемелермен танысты. Олардың қатарында қашықтан зондтау, робототехника, суперкомпьютерлік технология, биотехнология және нанотехнология бар.
Пленарлық сессияда сөз сөйлеген Ерболат Досаев ғылым мен инновацияны ілгерілету – Мемлекет басшысының саясатының басты басымдығының бірі екенін атап өтті.
«Президентіміздің идеяларын жүзеге асыруда Алматыға ерекше мән берілген. Қала – еліміздің ғылыми және білім беру орталығы. Мұнда Қазақстандағы жоғары оқу орындарының үштен бірі орналасқан, 280 мыңнан астам студент білім алуда, 130-дан астам ғылыми-зерттеу орталығы жұмыс істейді. Бұл еліміздегі барлық ғылыми ұйымдардың үштен бірі», – деді Ерболат Досаев.
Соңғы үш жылда ҒЗТКЖ шығындары екі еседен астам өсіп, 2022 жылғы 47 миллиард теңгеден 2024 жылдың қорытындысы бойынша 95 миллиард теңгеге жетті.
Бұған қоса, 2024 жылдың қыркүйек айында мегаполисте Ғылым және технологиялар кеңесі құрылды. Бұл кеңес ғалымдар, бизнес және мемлекет арасындағы диалог алаңы. Басты мақсаты – технологияларды нақты секторға енгізу мәселесін шешу.
Қала басшысының айтуынша, Алматының даму бағдарламасы ғылым жетістіктері мен технология трансфертін белсенді пайдалануға негізделген.
«Бізде зерттеулерді қаржыландыруға және технологияларды қала өміріне енгізуге қажетті құралдар мен мүмкіндіктер бар. Егер жеткілікті жоба ұсынылса, биыл біз қала дамуының жеті негізгі бағытына сәйкес түрлі жобаларға 10 миллиард теңгеге дейін бөлуге дайынбыз», – деді Ерболат Досаев.
Ол цифрландыру мен жасанды интеллекттің жаһандық экономикалық дамудағы маңыздылығы артып келе жатқанын еске салды.
Алматы қаласы Цифрландыру басқармасының мәліметінше, 2024 жылдың қорытындысы бойынша мегаполис Қазақстанның IT-секторының көшбасшысы болып қала береді. Бұл саладағы қызметтердің 52%-ын Алматы қамтамасыз еткен. Өткен жылы Қазақстандағы IT-нарықтың жалпы көлемі шамамен 3 трлн теңге болса, оның 1,6 трлн теңгесі Алматыға тиесілі.
Өз кезегінде, ҚазҰУ ректоры Жансейіт Түймебаев Қазақстан ЖОО-лары арасында ең ірі технопарк, инновациялық парк және жасанды интеллект орталығын салу жоспарланып отырғанын жеткізді.
«ҚазҰУ Алматының инновациялық экожүйесіне кірігуге және ғылыми әзірлемелерді коммерцияландыруға зор мүмкіндіктерге ие», – деді ол.
Жалпы, форум қатысушылары ғылым, бизнес және өндіріс интеграциясын дамыту бойынша ұсыныс пен идеясын ортаға салды.
