Түркістан қаласының мәдени-рухани орталығында жаңа туристік нысан – «Қолөнершілер қалашығы» бой көтеруде. Облыс әкімі Нұралхан Көшеров жауапты басқарма басшылары мен қолөнер саласының өкілдерімен кездесіп, аталған орталықты дамыту, жұмысын үйлестіру бойынша кеңес өткізді, деп хабарлайды Dalanews.kz
Өңір басшысы «Қолөнершілер қалашығы» заман талабына сай болып, мәдениетті, қолөнерді және туризмді дамытуға серпін беруі тиіс екенін жеткізді.
– Биыл жаңа заң қабылданып, Түркістанға ерекше мәртебе берілді. Ол заңда қолөнер саласын дамыту міндеті де жүктелген. Бұл ретте тарихи шаһардың әлеуеті жоғары екенін білеміз. «Қолөнершілер қалашығын» дамытып, жұмысын жүйелі түрде үйлестіру керек. Бұл жоба туризмді, қолөнерді дамытып қана қоймай, өзін-өзі қамтитын, кірісті ұлғайтатын деңгейге көтерілуі қажет. Жан-жақты ойластырып, жұмысты сапалы атқарыңыздар, – деді Нұралхан Көшеров.
Жиында Түркістан облысы әкімінің бірінші орынбасары Зұлпыхар Жолдасовтың, Туризм басқармасының басшысы Нұрдәулет Медеуовтің «Қолоөнершілер қалашығына» қатысты ұсыныстары мен жоспарлары тыңдалды.
Тиісті орталықта қолөнершілер шеберханасын іске қосу бойынша жергілікті қолөнершілермен арнайы жиналыс өткізілген. Қолөнер шеберханасына қажетті құрал-жабдықтардың шығындары анықталды. Қажетті қаражат көлемі жоба бойынша 120,0 млн. теңге деп есептелді. Қазірден бастап, белсенді шеберлерді ынтымақтастыққа шақыру, олармен жеке кездесулер өткізу және тиісті шарттар жасасу арқылы қолөнершілер пулын құру жұмыстары басталып кетті. Орталық қажетті құрал-жабдықтармен қамтамасыз етіліп, шеберлермен тиісті келісімдер жасалады.
Айта кетейік, бұл жоба 2023 жылы «Sun Holiday» ЖШС бастамасымен қолға алынған. Қолөнершілері орталығының жалпы аумағы 2,3 гектарды, ал нысан құрылысы 1,5 гектар аумақты қамтиды.
«Қолөнершілер қалашығы» – дәстүр мен туризм тоғысқан бірегей жоба. Туристік кешен 8 негізгі бөліктен тұрады. 20 шеберхана, 2 шоурум, көрме залы, мейрамхана, қонақүй және өзге де қажетті бөлмелермен, орындармен қамтылады. Өңірдің және тұтынушының сұраныстарына қарай арнайы брендтік каталог тізбегі дайындалады. Сол каталог негізінде нарыққа кәдейсылар сатылымға шығарылады.
«Қолөнершілер қалашығы» қазақтың мәдениеті, қолөнерін дәріптейтін және туристік орталыққа айналады деп күтіліп отыр. Осы бағытта жұмыстар жалғасады.
