Мемлекеттік қызметтің мәртебесі биік болғанымен жүгі ауыр. Лауазымды тұлғаларға қызметтік этиканы сақтауы, әдеп стандарттарынан аспау, мемлекеттік қызмет көрсету деңгейінің жоғары болуы және сыбайлас жемқорлыққа жол бермеуі заңды тұрғыда міндеттелген. Бұл ретте кіл мықтылар ғана аталған үдеден шығады. Ал, осы тектес жұмыстарды бақылау әдеп жөніндегі уәкілдің тікелей құзіретіне жатады.
Жоғарыда аталған талаптарды орныдалуын қадағалау барысында Алматы облысы бойынша әдеп жөніндегі уәкілдер 659 адамға жеке қабылдау өткізіп, 1135 мемлекеттік қызметшіге кеңес берген. Жалпы саны 1803 азаматқа консультативтік көмек көрсетіліп, түсіндіру жұмысын жүргізіліпті. Жазбаша 34 хат қаралып, өтініш иелеріне мерзімінде жауап берілген.
Одан бөлек, 2020 жылы облыс бойынша жергілікті атқарушы органдар мен олардың құрылымдық бөлімдерінде этикалық нормаларды сақтау және сыбайлас жемқорлыққа қарсы 241 семинар өткізген. Осындай қарымды жұмыстың арқасында түсіндіру жұмыстары мен семинарлар өз жемісін бергенін атап айтуға болады. Оған айқын дәлел, әдеп жөніндегі уәкілдердің ұсынысымен 60 мемлекеттік қызметші ұжымда позитивті ахуал және мемлекеттік мекеменің оң имиджін қалыптастыруға ықпал еткені үшін марапатталуы.
Сонымен қатар, есепті мерзімде 2176 мемлекеттік қызметші Қазақстан Республикасы Президентінің жанындағы Мемлекеттік қызмет академиясының Алматы облыстық филиалының қысқа мерзімді оқыту курстарында біліктілігін арттырғандығын атап өткен жөн.
– Жергілікті мемлекеттік атқарушы органдардың ұжым мүшелері арасындағы моральдық-психологиялық ахуалдың жай-күйін мониторингтеу мақсатында анонимдік сауалнамаға жыл көлемінде 6779 азамат қамтылды. Қорытындысы бойынша қызметкерлердің және қызметкер мен басшылардың арасындағы қарым-қатынас, сенімділік, әдеп нормаларын сақтау жағдайлары талқыланып, мекеме басшыларына қандай мәселеге көбірек көңіл аудару қажеттігіне нақты кеңестер берілді. Осы арқылы мемлекеттік қызметшілердің жоғары мәдениетін қалыптастыруға және ұжымды ортақ мақсаттарға жетуге біріктіру үшін жұмыс жалғасуда, – деді Алматы облысы әкімі аппаратының әдеп жөніндегі уәкілі Ғабит Тұрсынбай.
Айта кету керек, Әдеп жөніндегі уәкілдердің қызметін одан әрі жетілдіру бойынша Мемлекеттік қызмет істері агенттігінің «Рухани жаңғыру» бағдарламасының «Өзгерістерді өзіңнен баста» кіші бағдарламасын іске асыру шеңберінде» 2021 жылға арналған 23 тармақтан тұратын жұмыс жоспары жүзеге асырылуда.
Онда, Абай Құнанбайұлының тағылымына байланысты, «Пайда ойлама, ар ойла» тақырыбында дөңгелек үстел өткізу, Мемлекеттік қызметшінің туған өлке тарихын білуге ықпал ете отырып, рухани және мәдени тұрғыда кемелдендіру көзделген.
Аталған іс-шаралар, мемлекеттік қызметкердің елінің алдында адал болуға үгіттейді. Алматы облысы әкімі аппаратының әдеп жөніндегі уәкілі Ғабит Тұрсынбай, «мемлекеттік қызметші ата-анасына қалай қызмет етсе, халқына дәл солай қызмет көрсетуі тиіс»,-деп сөзін түйіндеді.
