Олжас Бектенов бюджет қаражаты мақсатты пайдаланылуын бақылау тетіктері және цифрлық теңгені енгізу жөнінде кеңес өткізді, – деп хабарлайды Dalanews.kz.

Кеңесте ұлттық цифрлық қаржы инфрақұрылымын дамыту, цифрлық теңге арқылы бюджет қаражатын жұмсаудың қадағалануын және тиімділігін арттыруға бағытталған жобаларды іске асыру бағыты және алдағы жоспарлар қаралды. Мемлекет қаражаты жұмсалуын қадағалау мақсатында 2024 жылы іске қосылған цифрлық теңгені қолданатын пилоттық жоба барысы талқыланды.

Сыбайлас жемқорлыққа қарсы іс-қимыл агенттігінің төрағасы Асхат Жұмағали цифрлық теңге жобасы сыбайлас жемқорлыққа барынша бейім салаларда сынақтан өтіп жатқанын айтты.

Бүгінде барлығы 250 млрд-қа жуық цифрлық теңге айналымға енгізілген. Әзірлеушілер әр ақша бірлігіне бірегей цифрлық белгілерді байланыстыруды қарастырады, бұл қаражат бөлінуден бастап толық игерілуіне дейінгі барлық кезеңде қолданылуын бақылауға мүмкіндік береді. Бұл әдістің АӨК-тегі тиімділігі Ақмола облысындағы шаруа қожалықтарымен бірге "Ауыл аманаты" бағдарламасын іске асыру барысында қаралған. Арнайы бағдарламаланған цифрлық теңге фермерлердің мал басын сатып алуына несие беру кезінде пайдаланылды әрі жалған мәмілелер мүмкіндігін жойып, процестің толық ашық өтуін қамтамасыз етті.

Сонымен қатар, цифрлық теңге базасында әкімшілендіру тиімділігін арттыру және ҚҚС қайтару рәсімін жеделдету үшін "Цифрлық ҚҚС" пилоттық жобасы іске қосылды.

Премьер-министр Ұлттық цифрлық қаржы инфрақұрылымының ауқымын одан әрі кеңейтудің, сондай-ақ, бюджет қаражатын біршама үнемдеуді қамтамасыз ететін цифрлық теңгені неғұрлым кеңінен пайдаланудың маңызы жөнінде айтты.

"Мемлекет басшысы атап өткендей, цифрлық теңге арқылы "ақшаны таңбалау және бояу" бюджет қаражатының жұмсалуын бақылау тетігі болуы мүмкін. Жалпы Ұлттық банк қаржы жүйесін цифрлық трансформациялау бойынша басқа да мүдделі мемлекеттік органдармен бірлесіп, ауқымды жұмыс атқарып жатыр. Цифрлық теңгеге келетін болсақ, сіздердің бастамаларыңызды қолдаймын. Цифрлық теңгені енгізу жаңа технологиялық ахуалды ескере отырып, қаржыландыру үдерістерін оңтайландыруға көмектесетініне назар аудару қажет.

Бизнес үдерістер де өзгеріп, ашық болуы керек. Кәсіпкерлерге қатысты мынадай қағиданы ұстанған жөн: бюджет ақшасымен жұмыс істесеңіз, ашық болыңыз. Оны қайда жұмсайтыныңызды және жеткізушілер мен мердігерлердің толық тізбегін ашып көрсетіңіз. Сондай-ақ, цифрлық теңгенің пилоттық жобасын кеңейту қажет",- деді Олжас Бектенов.

Кеңес қорытындысы бойынша Цифрлық даму, инновациялар және аэроғарыш өнеркәсібі, Қаржы, Өнеркәсіп және құрылыс, Ұлттық экономика министрліктері жаңа цифрлық құралдарды қолдануды реттейтін заңнамаға түзетулерді пысықтап, электрон ақшаны бағдарламалау әдіснамасын әзірлейді.