– Жаңа туылған нәрестелердің ең көбі – Қарасай және Іле аудандарында тіркеледі деп күтілуде. Жоспар бойынша айы-күні жетіп отырған аналар отыз шақты. Атап өтсек, жыл сайын өңірде бала туу көрсеткіші артып келеді. Жалпы, жылына 50 мыңға жуық сәби дүние есігін ашады, – дейді Алматы облыстық перинаталдық орталықтың басшысы Қанат Жұмашев.
Шыр етіп, дүниеге келген нәрестенің үнін есту анаға да, дәрігерге де үлкен бақыт. Міне, осындай бақытты сәтті бастан кешіріп Ескелді ауданында – 3, Кербұлақ ауданында – 4, Сарқан ауданында –10 әйел тура 16-шы желтоқсан күні ана атанды.
Олардың сөзінше, бұл жәй сәйкестік емес. Отбасылар үшін маңызы зор қуаныш. Енді олар қос мерекені қатар тойлайтын болады.
– Тәуелсіздік күн жыл сайын біздің шаңырақ үшін қастерлі мереке саналатын. Бүгіннен бастап тағы қуанышымыз еселеніп жатыр. Қатарымыз толығуда. Барлық қазақстандықтарды мерекемен құттықтаймын! Осындай алаңсыз күндеріміз ұзағынан болсын. Осы ретте облыс басшылығына алғыс білдіргім келеді. Өңірдегі демографияға көп көңіл бөліп, қолдау танытып жағдайымызды жасап беріп жатқан. Ақ халаттыларға да рахмет! – деп бөлісті жас ана Ақбота Солтанбек.
Ал, Сарқандық көпбалалы ана Назгүл Ерғалива осы күні 7-ші сәбиін босанды. 35 жастағы ана тәуелсіздік күніндегі туылған ұлым отбасымызға үлкен үлкен сый болды, дейді.
– Күтпеген жағдай болды. Тұп тура 16-сы күні босанам деп ойламаппын. Өзім осы орталыққа порталмен келгем. Айы күнім жетіп осы мейрамға бұйыртыпты. Қуанышымда шек жоқ. Шүкір, қазір 4 қыз, екі ұлым бар. Әкесі де бауырлары да қатты қуанды. Енді біздің отбасы қос мерекені бірге атап өтетін болады, – деп бөлісті жас ана.
Жалпы, жыл басынан Талдықорғандағы облыстық перинаталдық орталықта 6050-ден аса сәби дүниеге келген. Орталық директорының айтуынша, биылғы жылы бала туу көрсеткіші жоғары. Өткен жылдың 12 айында 6600 ана босанса, жыл соңына дейін 7000-ға жетеді деп күтіліп отыр.
