Túrkistan óńirinde kásip ashqysy keletin investorlarǵa jan-jaqty memlekettik qoldaý kórsetilýde. Oblys ákimi Darhan Satybaldy kezekti investitsiialyq shtab otyrysyn ótkizip, óńirde jańa óndiris oryndaryn ashatyn kásipkerlermen joba barysyn jan-jaqty talqylady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Investitsiialyq shtab – biznes máselelerin jedel sheshýge arnalǵan ashyq alań. Ákim energetika salasy, sút óńdeý zaýyty, tigin fabrikasy, meditsinalyq buiymdar óndirisi, mal bordaqylaý alańy, kir jýatyn untaq, turmystyq himiia óndirisin qolǵa alǵan investorlarmen jumys barysyn pysyqtady.
Investitsiialyq shtab otyrysynda kórsetiletin jan-jaqty memlekettik qoldaýdy qamtamasyz etý arqyly jańa jobalardy júzege asyrýyna yqpal etetini aityldy. Oblys ákimi investorlarǵa ońtaily ári yńǵaily orta qalyptastyrý úshin bizneske qoiylatyn artyq talaptardy joiýdyń mańyzdylyǵyn atap ótti. Qurylysy júrip jatqan zaýyt, fabrikalardyń mańyzdylyǵy men tiimdiligin eskertip, osy maqsatta jaýapty tulǵalarǵa infraqurylym tartýǵa qatysty naqty tapsyrmalar berdi.
– Qaǵazbastylyq degendi doǵarý qajet. Investorlardyń túrli kedergilerge tap bolýyna jol berilmeý kerek. Ol úshin ár ákim, basqarma basshylary tikelei jaýapty ekenin eskertemin. Ár investitsiialyq jobanyń júzege asyrylý barysy qatań baqylaýda. Eshqandai tejeý bolmaýy kerek. Elektr energiiasy, gaz boiynsha másele týyndaǵan jaǵdaida, shuǵyl áreket etip, sheshý qajet. Ony sozbalańǵa salýdyń ózi – syn. Asa mańyzdy shikizatty óndirý jáne óńdeý salasyna basymdyq beriledi. Tapsyrma berilgenin kútip otyrmai, bastama kóterip, derbes jumys istei bilińizder, – dedi Darhan Satybaldy.
Sondai-aq, Darhan Satybaldy tanystyrylǵan jańa jobalardyń mańyzdylyǵyna nazar aýdaryp, aýdan basshylary men jaýapty sala basshylaryna investorlarǵa qoldaý kórsetýdi tapsyrdy. Aýdan, qala ákimderiniń jumysy investitsiia tartýmen, halyqty jumys ornymen qamtýmen baǵalanatynyn eske saldy.
Túrkistan oblysynda qazirgi ýaqytta óndiristi damytý baǵytynda jumystar qarqyndy júrgizilýde. Biyl jalpy quny 136,0 mlrd. teńgeni quraityn 56 investitsiialyq jobany iske asyrý josparlanǵan. Nátijesinde 2 myńnan astam turaqty jumys oryndary ashylýda. Búginge kúni 31 investitsiialyq joba iske qosyldy.
Importtan táýeldilikti azaitý úshin, Óndiristik parkte memleket tarapynan kásiporynǵa qajetti infraqurylymmen qamtamasyz etilgen daiyn ǵimarat usynylady. Óndiristik keshende 39 ǵimarat boi kóterýde. 10 kásiporyn iske qosyldy. Budan bólek, óńirde 13 indýstrialdy aimaq jáne arnaiy ekonomikalyq aimaq bar. Onda jumys bastap jatqan kásiporyndar salyqtan bosatylady. Kedendik jeńildikter qarastyrylǵan, infraqurylymy bar. Jalpy arnaiy ekonomikalyq jáne indýstrialdy aimaqtarda 53 kásiporyn jumys isteidi. Sondai-aq 139,4 mlrd. teńgege 29 jobanyń qurylys jumystary júrgizilýde.
Túrkistan oblysynda kásipkerlerdiń sany jyl basynan 2 myńǵa artyp, búginde 208 myńdy qurady. Atalǵan salada 282 myń adam jumyspen qamtylǵan. Sheteldik investorlardyń qatysýymen óńirde jalpy quny 1,1 mlrd. AQSh dollaryn quraityn 7 investitsiialyq jobany júzege asyrý josparlanyp, qazirgi ýaqytta tekstil klasterin qurý jáne aliýminii buiymdaryn shyǵarý zaýyty investitsiialyq jobalarynyń qurylysy bastaldy.
