Májilis Qazaqstan Respýblıkasynyń jańa Búdjet kodeksin qabyldap, qujatty Senattyń qaraýyna joldady, dep habarlaıdy Dalanews.kz.

Jańa kodeks jobasyn ázirleý Májiliste 2023 jyldyń qyrkúıeginde bastalǵan bolatyn. Osy ýaqyt ishinde qujat jumys tobynyń talqylaýlarynan ótip, birqatar túzetýler engizildi.

Kodekstiń basty maqsaty — boljamdaý sapasyn arttyryp, búdjettiń kiristerin ulǵaıtý. Osyǵan oraı, ekonomıka salalarynyń túsimder kólemine áserin taldaý tártibin retteıtin normalar engizildi. Bul normalar shyǵystardyń basym baǵyttaryn aıqyndaýǵa múmkindik beredi. Iaǵnı, salalyq memlekettik ınvestısıalyq jobalardy júzege asyrý týraly sheshimder olardyń ekonomıkaǵa áserin (JİÓ-ge qosqan úlesi, búdjetke túsimderdiń ósýi, ınvestısıalar kólemi) eskere otyryp qabyldanatyn bolady. Osylaısha, búdjettik zańnama qarajatty ıgerýge emes, naqty ekonomıkalyq jáne áleýmettik nátıjelerge qol jetkizýge baǵyttalady.

Memlekettik organdardyń kiristerdi josparlaý jáne ákimshilendirý boıynsha ókilettikteri naqtylanyp, olardyń ózara árekettestigi kúsheıtildi. Bul salyqtyq emes túsimderdi baqylaý, eseptilik júrgizý jáne kirister boıynsha málimetter almasýdy qamtıdy. Budan bólek, búdjettiń oryndalýy týraly jyldyq esepke kirister boıynsha egjeı-tegjeıli taldamalyq aqparat engizý josparlanǵan (salyqtyq bereshek, aldyn ala tólemder, salyqtyq alshaqtyq negizinde alynǵan kirister jáne t.b.).

Óńirlik búdjetterdiń kiristeriniń asyra oryndalǵan somalary, eń aldymen, qaryzdardy óteýge jáne gazdandyrý, sýmen jabdyqtaý, jylý jáne elektr jelilerin jańartý, jol jóndeý sıaqty basym jobalardy qarjylandyrýǵa jumsalatyn bolady.