Igi ister marafony: Astana kommýnalshylaryna shai men baýyrsaq berildi
Qardyń mol jaýýyna bailanysty elordanyń kommýnaldyq qyzmetkerleri táýlik boiy kúsheitilgen rejimde jumys istep jatyr.
Kúndizgi aýysymǵa 1700-den astam arnaiy tehnika men 2500-ge jýyq jol jumysshy kóshelerdi qardan tazartýǵa shyqty. Ótken táýlikte qaladan 37 myń tekshe metrden astam qar shyǵaryldy, bul 2802 júk reisin quraidy.
Túngi aýysymǵa qar tazalaýǵa 1500-den astam arnaiy tehnika men 400-ge jýyq jol jumysshy shyqty.
Búgin qar tazalaýmen ainalysatyndardyń barlyǵyna eriktiler baýyrsaq pen ystyq shai taratady.
Mundai igi is qalanyń barlyq aýdanynda júrgiziledi.
«Beitanys adamdarǵa qamqorlyq kórsetip júrgen eriktilerge alǵysymyz sheksiz. Bul júrekkejylýlyq syilaidy», – deidi jol qyzmetkerleriniń biri.
Qys mezgiliniń basynan bastap elordada 1 508 140 tekshe metr qar shyǵaryldy, bul 111 myńnan astam aýyr júk reisin quraidy.
Eriktiler ystyq shai men baýyrsaqtardy taratýmen qatar, qar tazalaýǵa kómek kórsetedi, halyqtyń áleýmettik osal toptarynan shyqqan otbasylarǵa azyq-túlik sebetterin tasymaldaidy, qart kisilerge otyn kesýge kómektesedi.
Esterińizge sala keteiik, elordada igi ister marafony ótip jatyr. Aktsiianyń basty maqsaty – eriktiler men turǵyndarǵa halyqtyń áleýmettik álsiz sanattaryna, qart adamdarǵa, muqtaj zeinetkerlerge barynsha kómek kórsetý.
