Bul rette «Ońtústik» aımaqtyq ınvestısıalyq ortalyqtyń bastamasymen shaqyrylǵan delegasıa quramynda Inchhon ulttyq ýnıversıtetiniń qurmetti profesory, Nobel syılyǵynyń laýreaty Rae Kvon Chýng, ońtústikkoreıalyq ǵalymdar Iý Djae Cheon jáne Kvang-Don Kım, Ekologıalyq uıymdar qaýymdastyǵy basqarmasynyń tóraıymy Aıgúl Saǵadıbekqyzy, G-Global «Jasyl ekonomıka» jáne damý koalısıasynyń tóraıymy Saltanat Rahymbekova boldy.
Janseıit Túımebaev Túrkistanǵa ınvestısıa tartý durys uıymdastyrylsa, bolashaqta Ortalyq Azıadaǵy ınvestısıalyq býmnyń eń belsendi núkteleriniń biri bola alatynyna senim bildirdi. Ekijaqty kezdesýde Túrkistan aımaǵynda eko-qalalardy qurý jáne aımaqty energıamen jabdyqtaý, sondaı-aq, SuperGrid arqyly energıany uzaq qashyqtyqqa eksporttaýǵa baǵyttalǵan «Jasyl energetıka» salasyndaǵy jahandyq jobalar talqylandy. Jobalar aımaq basshysy tarapynan oń baǵa aldy jáne kezdesýden keıin oblys ákimi olardy damytý jáne engizý boıynsha jumys tobyn qurýdy tapsyrdy.
«Jasyl ekonomıka» tujyrymdamasy sheńberinde «Ońtústik» aımaqtyq ınvestısıalyq ortalyǵy Túrkistan aımaǵynda turmystyq qatty qaldyqtardy óńdeýdiń jobasyn ázirlep, ony Túrkistanda iske asyrýdy buǵan deıin usynǵan bolatyn. Sapar barysynda ońtústikkoreıalyq ǵalymdar Túrkistan qalasyndaǵy qatty qaldyqtardyń morfologıasyn zerttep, yntymaqtastyq týraly usynystarǵa qyzyǵýshylyq tanytty. Nobel syılyǵynyń laýreaty Rae Kvon Chýng endi Túrkistan qalasynda júzege asatyn «Jasyl tehnologıalar» negizindegi jobalarǵa ınvestısıa tartý baǵytynda jumys istemek.
Nurlan Áýbákir, jýrnalıs.
