Qazaqstanda inkliýziiany damytýdyń naqty qadamdarynyń biri retinde temirjol kóligine qatysty birqatar jańalyqtar bar. Endi I jáne II toptaǵy múgedektigi bar azamattardy ertip júretin tulǵalar jáne erekshe qajettilikteri bar balalardyń serikteri temirjol biletterin 50 paiyz jeńildikpen ala alady. Bul jańalyqtar QR Kólik ministrliginiń bastamasymen Jolaýshylardy tasymaldaý erejelerine engiziletin ózgerister jobasynda kórinis tapqan.
Buryn múmkindigi shekteýli jolaýshylar men olardyń erip júrýshileri saparǵa shyǵar aldynda meditsinalyq mekemelerden anyqtama jinap, qujattaryn kórsetýge májbúr bolatyn. Endi bul talaptyń joiylýy azamattarǵa edáýir jeńildik ákeledi. Erejelerdiń 44-tarmaǵynan meditsinalyq anyqtamalardy usyný normasy alynyp tastalyp, jolaýshy týraly málimetter avtomatty túrde memlekettik derekqor arqyly tekseriledi.
Kólik ministrliginiń habarlaýynsha, bul ózgeristerdi ázirleýge temirjol jáne sý kóligi komitetiniń mamandary tikelei qatysqan. Qazir joba bekitý kezeńinde tur. Qujattar maquldanǵan jaǵdaida jańa erejeler 2025 jyldyń ekinshi jartysynan bastap kúshine enedi dep josparlanyp otyr.
«Qazirgi tańda múmkindigi shekteýli azamattar áleýmettik mańyzy bar baǵyttar boiynsha ǵana 50 paiyz jeńildikpen jol júrýge quqyly. Alaida bul jeńildik tek olardyń ózderine arnalǵan edi. Jańa bastama bul sheńberdi keńeitip, olardyń serikterin de qamtidy. Bul qadam múmkindigi shekteýli adamdardyń óz betimen qozǵalýyn jeńildetip qana qoimai, olardyń erkin, qaýipsiz jáne laiyqty sapar shegýine jaǵdai jasaidy», - dep málimdedi Kólik ministrliginen.
Sonymen birge, Qazaqstanda arnaiy jabdyqtalǵan jolaýshylar vagondarynyń parki de jańartylyp jatyr. Kólik infraqurylymyn damytý baǵdarlamasy aiasynda «ZIKSTO» otandyq zaýytynan 157 jolaýshylar vagony satyp alynady. Onyń ishinde 14 vagon múmkindigi shekteýli jandarǵa beiimdelgen. Qazirdiń ózinde tórt jańa vagon paidalanýǵa berildi, al jyl sońyna deiin taǵy on vagon iske qosylady.
Taǵy bir aýqymdy jospar – 2025 pen 2030 jyldar aralyǵynda «Shtadler – Qazaqstan» zaýytynan elimizge 557 jańa vagon jetkizý. Bul vagondardyń 35-i arnaiy kýpelermen jabdyqtalyp, erekshe qajettilikteri bar jolaýshylardyń suranysyna tolyqtai sai bolady.
Jańartýlar tek vagondarmen shektelmeidi. Temirjol vokzaldary da tolyq beiimdelý ústinde. Joba aiasynda biyl birqatar vokzaldarda pandýstar ornatylady, perrondarǵa arnaiy kótergish qurylǵylar qoiylady jáne taktildi baǵyttaýshy jolaqtar salynady. Bul jumystardyń barlyǵy — múmkindigi shekteýli azamattardyń vokzal aýmaǵynda erkin qozǵalýy úshin atqarylýda.
Bul bastamalar – elimizdegi inkliýziia baǵytyndaǵy júieli jumystyń bir kórinisi. Múmkindigi shekteýli jandar úshin tek quqyqtyq emes, infraqurylymdyq jáne logistikalyq qoljetimdilikti de qamtamasyz etý – naǵyz órkenietti qoǵamnyń belgisi. Qazaqstan bul baǵytta aiqyn ilgerileý jasap keledi.
Mundai jeńildikter men infraqurylymdyq sheshimder azamattardyń qoǵam ómirine belsendi aralasýyna, bilim alyp, jumys isteýine, sapar shegip, mádeni sharalarǵa qatysýyna múmkindik beredi. Eń bastysy — olardy tolyqqandy azamat retinde tanýǵa yqpal etedi.
