Belgili aitysker Ainur Tursynbaevanyń kúieýi Nurjan Imanáliev «Dikii Armanǵa» qoldaý bildirdi, dep habarlaidy Dalanews.kz.
«Búgin Arman baýyrymyzǵa jáne onyń janyndaǵy baýyrlarymyzǵa qatysty qatań úkim shyqty. Bul júregimizge aýyr tise de, biz musylman retinde Alla Taǵalanyń synaqtaryna sabyr etip, ár nárseniń hikmetin túsinýge tyrysamyz. Alla Taǵala júregimizge sabyr berip, bul qiynshylyqty jeńýge kúsh-qýat násip etsin!
Sabyr – musylmannyń eń ásem qasietteriniń biri. Alla Elshisi (oǵan Allanyń salaýaty men sálemi bolsyn): «Musylmannyń jaǵdaiy qandai keremet! Onyń árbir isi qaiyrly, al mundai jaǵdai tek múminge ǵana tán. Eger oǵan bir qýanysh kelse, shúkirshilik etedi, bul – onyń igiligine. Al eger oǵan bir synaq kelse, sabyr etedi, bul da – onyń igiligine» (Mýslim).
Arman baýyrymyz ben onyń otbasysyna bul synaq úlken emtihan ekeni sózsiz. Biraq árbir qiyndyqtyń artynda jeńildik bar ekenin umytpaiyq. Alla Taǵala bylai deidi: «Shynynda, qiyndyqpen birge bir jeńildik bar. Anyǵynda, qiyndyqpen birge bir jeńildik bar» (Inshirah súresi, 5-6-aiattar).
Bul sátte biz baýyrlarymyzǵa tek qoldaý kórsetip qana qoimai, duǵada bolýymyz kerek. Alla Taǵala barlyǵymyzǵa sabyr men iman bersin, bul synaqtyń aqyryn jaqsylyqqa ainaldyrsyn. Arman baýyrymyz ben onyń otbasyna Allanyń meiirimi jaýyp, júrekterine tynyshtyq násip etkei», - dep jazdy ol.
Eske salaiyq, buǵan deiin Dikii Armannyń áieli kúieýiniń 20 jylǵa sottalýyna qatysty oiyn jazǵan bolatyn.
"Úkim osyndai bolatynyn bildim, biraq keshe kózim jetti. Sonda da úmitim boldy. Meniń de, onyń da eńsesi túspegenin bilseńizder eken dep jazyp otyrmyn. 20 jyl degen ne ol? Onyń úsh jyly ótip ketti, 17 jyly qaldy.
Bastapqyda onymen kezdesýge ruqsat bergen kezde eńsesi túsip, ómir súrgisi kelmei ketkenin baiqadym. Sol kezde men ony qushaqtap, "Al biz she? Bizdiń qyzymyz she?" dep suradym. Ol kúlimsirep, "iá, durys aitasyń" dedi. Áli qyzymyzdy uzatýymyz kerek. Osy oi onyń júregine jylý syilady. Osy oimen ómir súrdi. Qyzymyzdyń sýretterin qarap, ol týraly áńgimelerdi tyńdaǵandy jaqsy kóredi. Qyzymyz áli kishkentai ári ázirge eshteńeni túsinbeitini qandai jaqsy. Basqa aitarym joq", deidi Aikol.
Eske salaiyq, 27 qańtarda Arman Jumageldievtiń qylmystyq toby Almaty qalasynda jappai tártipsizdikter uiymdastyrý jáne azamattardy urlap áketý boiynsha aiyptalyp, sottaldy.
Sot sheshimimen Jumageldiev QR QK-niń birneshe baptary boiynsha kináli dep tanylyp, 20 jylǵa bas bostandyǵynan aiyryldy. Ysqaqov – 15,6 jyl, Qudaibergen – 8 jyl, top músheleri – 10-15,5 jylǵa, basqa qatysýshylar – 1,5-7 jylǵa sottaldy.
Úkim zańdy kúshine engen joq.
