Ákimniń aitýynsha, Abaidyń 175 jyldyǵyn daiyndaý jáne ótkizý jónindegi memlekettik komissiianyń tóraǵasy Qyrymbek Kósherbaev Semeidegi barlyq nysandardy qarap shyqty. Onyń arasynda jańartylǵan Abai alańy bar jáne 3 trýppa qyzmet etetin Abai teatry akterler úshin ǵana emes, qala turǵyndary úshin de naǵyz syi boldy.
Bul rette Abai mýzeii de jańasha kelbette kórindi. Kelýshiler uly aqynǵa tiesili jádigerlerdi, qujattardy qarap qana qoimai, mýltimediialyq joba kómegimen Abaidyń ómir súrgen kezeńine saiahattap, ulttyq aspaptardyń qalai dybystaitynyn esti alady.
– Mýzeidiń ortalyq bóliginde «Abai jáne uldary» músini qoiylǵan. Avtorlar munda portrettik uqsastyqty ǵana emes, basty oidy – uldardyń uly ákesine degen mahabbaty men maqtanyshyn da jetkize aldy, – dep atap ótti D.Ahmetov.
Sonymen birge, ákim Aqshoqy aýylynda aqynnyń otbasyna arnalǵan mýzei ashylǵanyn jetkizdi. Al Qaraýyl aýylyndaǵy jańa mektepte zamanaýi IT jáne fizika, himiia, robototehnika synyptarynan bólek jas jýrnalisterdiń mýltimediialyq stýdiiasy da bar. Abai saiabaǵy mańynda keleshekte jańa zamanaýi shaǵynaýdan salynady.
– Árine, basty nysan – Jidebaidaǵy memorialdyq keshen. «Abai – Shákárim» kesheniniń jańa kelbeti, zamanaýi arhitektýralyq formalary nysannyń mańyzyn arttyra túskeni sózsiz. Bul qazaqstandyqtar men qonaqtarymyzdyń eń kóp baratyn jeri bolaryna senimdimin, – dedi Danial Ahmetov.
