Almaty ákimi Darhan Satybaldy áleýmettik nysandardyń qurylysyna, jol ınfraqurylymy men qoǵamdyq keńistikterdi damytýǵa qatysyp júrgen merdiger uıymdardyń quryltaıshylarymen keńes ótkizdi, dep habarlaıdy Dalanews.kz.
Kezdesý barysynda qala boıynsha júzege asyp jatqan jobalardyń oryndalý barysyna aralyq qorytyndy jasaldy. Búginde Almatyda 147 joba iske asyrylyp jatyr, sonyń ishinde 26 nysanda merzim saqtalmaǵan, sapaǵa qatysty talaptar buzylǵan.
Almatynyń Qala qurylysyn baqylaý basqarmasynyń basshysy Oljas Tólebaevtyń aıtýynsha, monıtorıń nátıjesinde kelisimshart merzimin únemi buzyp, qurylys normalaryn saqtamaıtyn toǵyz merdiger anyqtalǵan. Olardyń jumysynda jobadan aýytqý, uıymdastyrý deńgeıiniń tómendigi jáne qujat júrgizýdegi salǵyrttyq jıi baıqalady.
Qala ákimi Darhan Satybaldy mundaı nemquraılylyq qala turǵyndarynyń narazylyǵyn týdyryp otyrǵanyn jetkizdi. Kópshilik mektep pen balabaqsha qurylysynyń sozbalańǵa salynǵanyna, saıabaqtar men jaǵalaýlardy abattandyrý jumystarynyń keshigýine, sondaı-aq jol men trotýardaǵy qazylǵan jerlerdiń ýaqytynda qalpyna keltirilmeýine shaǵymdanǵan.
"Keıbir kompanıalar bir nysandy bitirmeı jatyp, jańasyn qolǵa alatyn keleńsiz ádet qalyptastyrǵan. Mundaı tájirıbege múlde jol berýge bolmaıdy. Óıtkeni másele adamdardyń qaýipsizdigi men jaıly ómiri týraly bolyp otyr. Eger merdiger mindetin tıisti deńgeıde oryndamasa, ol qala jobalarynda jumys istemeýi kerek", – dedi Darhan Satybaldy.
Keńes qorytyndysy boıynsha Almaty ákimi Qala qurylysyn baqylaý basqarmasyna mundaı nysandy ár apta saıyn qadaǵalap otyrýdy, jaýapsyz merdigerlerdiń lısenzıasynan aıyrýdy jáne qajet bolsa materıaldardy quqyq qorǵaý organdaryna jiberýdi tapsyrdy.
