Aqtóbede bes bala óz otbasynda bolǵan jaǵdaiǵa bailanysty prezident pen qazaqstandyqtardan kómek surap, videoúndeý jariialady. Qazirgi tańda olar Aqtóbe qalasyndaǵy "Aiala" balalar ortalyǵynda ýaqytsha ornalasqan. Balalardyń aitýynsha, anasy bir kúnniń ishinde májbúrli túrde psihiatriialyq aýrýhanaǵa jatqyzylyp, al ózderi ortalyqqa jiberilgen, dep habarlaidy Dalanews.kz.
Stan.kz jariialaǵan videoda balalardyń biri otbasynyń basyndaǵy jaǵdaidy túsindiredi. Onyń sózinshe, olar osy ýaqytqa deiin naǵashy ájesiniń qolynda turǵan. Alaida úige bailanysty týystar arasynda daý týyndaǵannan keiin, anasyna qysym kórsetilip, úi úlesinen bas tartý týraly ótinish jazýǵa májbúrlengen. Osy oqiǵadan soń anasy aýrýhanaǵa jatqyzylyp, balalar "Aiala" ortalyǵyna jetkizilgen.
Balalardyń aitýynsha, olardyń anasy eshqandai psihikalyq dertke shaldyqpaǵan. Olar ózderiniń eshqandai qamqorshysy joq ekenin aityp, memleket pen halyqtan kómek surady.
"Anamyz aýrý emes. Oǵan bári jala jaýyp otyr. Bir kúnniń ishinde otbasymyzdy bólip tastady. Bizge qorǵan bolar er adam joq. Ákemiz ishimdikke salynyp ketken. Anamyz osy kúnge deiin bizdi jalǵyz ózi baǵyp kelgen. Al qazir biz balalar úiine ótip ketemiz be dep qatty qorqyp otyrmyz", – deidi qyz videoúndeýde.
Qazirgi tańda bul jaǵdai qoǵam nazaryn aýdaryp otyr. Ázirge Aqtóbe oblysynyń bilim basqarmasy men politsiia departamenti tarapynan resmi túsinikteme berilgen joq.
