Qazaqstan qorǵanys ministrligi Astanada mitingige shyqqan analardyń talaptaryna jaýap retinde áskeri qyzmetshilerdiń qaýipsizdigine basymdyq beriletinin málimdedi, dep habarlaidy Dalanews.kz Kaztagqa silteme jasap.
«Qazaqstan Respýblikasynyń Qorǵanys ministrligi áskeri qyzmetshilerdiń qaýipsizdigin, quqyqtyq tártipti jáne quqyqtaryn qorǵaýǵa birinshi kezekte nazar aýdarady. Quqyq buzýshylyqtarǵa jol bermeý úshin birqatar sharalar júzege asyrylyp jatyr: moraldyq-psihologiialyq ahýaldy baqylaý kúsheitildi, zamanaýi aldyn alý ádisteri engizildi, áskeri psihologtar institýty men tárbie qurylymdary arqyly jeke qurammen maqsatty jumys júrgizilýde. Barlyq deńgeidegi komandirlerdiń jaýapkershiligi arttyryldy», – dep dúisenbi kúni jaǵdaiǵa túsinikteme berdi ministrlik.
Vedomstvonyń málimdeýinshe, «Beregi jizn», «Zakon i poriadok» jáne basqa da baǵdarlamalar iske asyrylyp jatyr.
«Apta saiyn sarbazdardyń ata-analarymen «Otbasymen beineqońyraý» servisi arqyly telefon arqyly sóilesý uiymdastyrylady. Jeke quram kún saiyn meditsinalyq tekserýden ótedi. Qyzmettik bólmeler men kazarmalarda videokameralar ornatylǵan. Sýitsidtiń aldyn alý jáne qarýǵa qoljetimdilikti baqylaý úshin jasandy intellekt elementteri bar beinabaqylaý júiesi engizilýde. Psihologiialyq qoldaý kúsheitildi, sarbaz analar komiteti de bar, sonyń ishinde qoǵamdyq uiymdarmen yntymaqtastyq jolǵa qoiylǵan. Buzýshylyqtar anyqtalǵan jaǵdaida qatań tártiptik sharalar qoldanylady», – dep sendirdi qorǵanys vedomstvosy.
Sonymen qatar, ministrlik «Qorǵanys ministrligi ata-analarmen ashyq ári konstrýktivti dialogqa daiyn ekenin jáne áskeri qyzmetke bailanysty árbir jaǵdaidy obektivti, jan-jaqty jáne ádil qaraýdy qamtamasyz etetinin» málimdedi.
«10 qarashada Azamattardy qabyldaý ortalyǵynda Qarýly kúshterde, basqa áskerler men áskeri qurylymdarda jaraqat alǵan jáne qaza tapqan áskeri qyzmetshilerdiń ata-analarymen kezdesý ótkiziledi. Azamattardy qabyldaýdy qorǵanys ministrliginiń tárbielik jáne ideologiialyq jumys departamentiniń bastyǵy, ádilet polkovnigi Tleýhan Bashojaev, Ulttyq ulannyń bas qolbasshysynyń orynbasary general-maior Qairat Ómbetov jáne basqa da laýazymdy tulǵalar júrgizedi. Árbir ótinish jeke tártippen tirkelip, qaralady», – delingen ministrliktiń habarlamasynda.
