Қазақстан қорғаныс министрлігі Астанада митингіге шыққан аналардың талаптарына жауап ретінде әскери қызметшілердің қауіпсіздігіне басымдық берілетінін мәлімдеді, деп хабарлайды Dalanews.kz Казтагқа сілтеме жасап. 

«Қазақстан Республикасының Қорғаныс министрлігі әскери қызметшілердің қауіпсіздігін, құқықтық тәртіпті және құқықтарын қорғауға бірінші кезекте назар аударады. Құқық бұзушылықтарға жол бермеу үшін бірқатар шаралар жүзеге асырылып жатыр: моральдық-психологиялық ахуалды бақылау күшейтілді, заманауи алдын алу әдістері енгізілді, әскери психологтар институты мен тәрбие құрылымдары арқылы жеке құраммен мақсатты жұмыс жүргізілуде. Барлық деңгейдегі командирлердің жауапкершілігі арттырылды», – деп дүйсенбі күні жағдайға түсініктеме берді министрлік.

Ведомствоның мәлімдеуінше, «Береги жизнь», «Закон и порядок» және басқа да бағдарламалар іске асырылып жатыр.

«Апта сайын сарбаздардың ата-аналарымен «Отбасымен бейнеқоңырау» сервисі арқылы телефон арқылы сөйлесу ұйымдастырылады. Жеке құрам күн сайын медициналық тексеруден өтеді. Қызметтік бөлмелер мен казармаларда видеокамералар орнатылған. Суицидтің алдын алу және қаруға қолжетімділікті бақылау үшін жасанды интеллект элементтері бар бейнабақылау жүйесі енгізілуде. Психологиялық қолдау күшейтілді, сарбаз аналар комитеті де бар, соның ішінде қоғамдық ұйымдармен ынтымақтастық жолға қойылған. Бұзушылықтар анықталған жағдайда қатаң тәртіптік шаралар қолданылады», – деп сендірді қорғаныс ведомствосы.

Сонымен қатар, министрлік «Қорғаныс министрлігі ата-аналармен ашық әрі конструктивті диалогқа дайын екенін және әскери қызметке байланысты әрбір жағдайды объективті, жан-жақты және әділ қарауды қамтамасыз ететінін» мәлімдеді.

«10 қарашада Азаматтарды қабылдау орталығында Қарулы күштерде, басқа әскерлер мен әскери құрылымдарда жарақат алған және қаза тапқан әскери қызметшілердің ата-аналарымен кездесу өткізіледі. Азаматтарды қабылдауды қорғаныс министрлігінің тәрбиелік және идеологиялық жұмыс департаментінің бастығы, әділет полковнигі Тлеухан Басхожаев, Ұлттық ұланның бас қолбасшысының орынбасары генерал-майор Қайрат Өмбетов және басқа да лауазымды тұлғалар жүргізеді. Әрбір өтініш жеке тәртіппен тіркеліп, қаралады», – делінген министрліктің хабарламасында.