Qazaqstan 2025 jáne 2026 jyldary óz mindettemelerin oryndaidy. Bul týraly QR Energetika ministrliginiń baspasóz qyzmeti OPEK+ otyrysynan keiin málimdedi, dep jazady Dalanews.kz.
"Qazaqstan OPEK+ Birlesken ministrlik monitoring komitetiniń keshegi 58-shi otyrysy aiasynda OPEK+ kelisimine adaldyǵyn rastaidy. Qazaqstan 2025 jáne 2026 jyldary óz mindettemelerin oryndaý jáne 2024 jylǵa artyq óndiristi óteý úshin qajetti sharalardy qabyldaidy", dep málimdedi ministrlikten.
Teńiz ken ornyn keńeitý jónindegi jobanyń iske qosylýyna bailanysty biyl óndiristiń ulǵaiýyna qaramastan, Qazaqstan OPEK+ kelisimi sheńberinde mindettemelerdi saqtaýdyń mańyzdylyǵyn rastaidy jáne halyqaralyq quqyq sheńberinde áriptestermen kelissózder júrgizetini de naqtylanady.
Esterińizge sala ketsek, buǵan deiin Qazaqstannyń munai óndirisiniń shekti kólemine qatysty buzýshylyqtardy óteý boiynsha jańa keste usynatyny habarlanǵan bolatyn. OPEK + Birlesken ministrlik monitoring komiteti otyrysynda óndiristi qosymsha qysqartýdy qosa alǵanda, QR kelisimderine beiildilikti jaqsartýdy quptady (elder 8-shi qatysýshy eldermen birge kvotalarǵa qosymsha qysqartýlarǵa qatysady). OPEK + Aliansynyń komiteti de qazirgi munai saiasatyn ózgertpeýge sheshim qabyldady.
OPEK+ Birlesken ministrlik monitoring komiteti dúisenbidegi otyrysynda Qazaqstan men Iraktyń kelisimderge beiildigin, onyń ishinde óndiris kólemin qosymsha qysqartýlar boiynsha óz mindettemelerin oryndaýdy jaqsartqanyn quptady. Sonymen qatar, OPEK + elderiniń ministrleri keńes barysynda alianstyń "eriktileriniń" erikti túrde qysqartý josparyn túzetýi (óndiristi birtindep ulǵaitý, 1 sáýirge aýystyrý) álemdik munai naryǵynyń turaqtylyǵyn qamtamasyz etetinin atap ótti. Bloomberg agenttigi Resei Federatsiiasynyń vitse-premeri Aleksandr Novak otyrysta OPEK+ qazirgi saiasatty ustanýy kerek dep málimdegenin habarlady. Taraptar monitoring komitetiniń otyrysy barysynda 2026 jyldyń sońyna deiin áreket etetin mámile aiasynda óz mindettemelerin ary qarai ustanatynyn taǵy da rastady. Alianstyń kelesi otyrysy 5 sáýirde ótedi.
Bul arada mynandai eki úlken máselege toqtala ketelik. Birinshiden, OPEK+ óz kelisimi sheńberinde aliansqa múshe elderden munaidy shektep óndirýdi talap etip keledi. Osylaisha olar munaidyń joǵary baǵasyn qamtamasyz etýge tyrysady. Soǵan sáikes, arnaiy keste de jariialanǵan. Qazaqstan bul kesteni arakidik buzyp otyrady, biraq aldaǵy óndiristi qysqartý arqyly onyń ornyn toltyrýmen keledi. Alaida biyl jyl basynda Teńizdegi jańa jobanyń iske qosylýy, munai óndirisiniń kólemin arttyrý boiynsha josparyn jariialaǵanda keibir sarapshylar Qazaqstan OPEK-ten shyǵyp tynýy múmkin degen edi. Biraq, ózderińiz kórip otyrǵandai, bul olai bolmady. Endeshe Qazaqstan áli de munaidy shektep óndirýge májbúr bolmaq. Biýdjet tapshylyǵyna urynyp otyrǵan Qazaqstan úshin bul jaqsy jaǵdai emes. Búite berse, bizneske salynatyn qosymsha qun salyǵy, aqyry jyl sońyna deiin ósip tynýy da ǵajap emes...
Ekinshiden, AQSh prezidenti Donald Tramp arab elderinen munai óndirisin ulǵaitýdy talap etý arqyly álemdik baǵany "qulatýdy" kózdeýde. Alaida, osy jinalystan belgili bolǵandai, OPEK+ qazirgi munai saiasatyn ózgertpeý týraly sheshim qabyldady. Demek, Tramptyń ótinishi bul arada eskerilmedi dese de bolady. Munyń arty jaqsy bolmasy anyq. Bul óz aldyna Dalanews.kz talqylar bólek taqyryp...
