Mundai standart pen talaptardy búginderi Atom energiiasy jónindegi halyqaralyq agenttik (AEHA nemese MAGATE) alǵa tartady.
Sondyqtan Dalanews.kz osy quzyrly uiym men Qazaqstan arasyndaǵy bailanystar, ózara yntymaqtastyq jaiyna mamandardy tarta otyryp, keńinen toqtalýdy jón kórip otyr.
Álemdik ekonomika PHD doktoranty, zertteýshi Amalbek Ómirtai Qazaqstannyń halyqaralyq qaýymdastyq aldynda aýaǵa shyǵaratyn kómirqyshqyl gazyn 2-3 esege azaitý týraly mindettemesi baryn eske salady.
- AES bizge osy turǵydan-aq kerek. Bir emes, birnesheýi. Al atomdyq energetikany damytý halyqaralyq áriptestik pen túrli halyqaralyq uiymdarmen yntymaqtastyq nátijesinde ǵana júzege asady. Bul rette Atom energiiasy jónindegi halyqaralyq agenttiktiń róli zor. Jalpy, iadrolyq synaq poligonyn jabý, joǵary baiytylǵan ýran óndirisin joiý, osylaisha iadrolyq qarýsyz el retinde ózin tanytqan Qazaqstannyń osy atqarǵan jumystarynyń barlyǵy atalǵan agenttik tarapynan joǵary qoldaýǵa ie. Qazaqstan bul uiymǵa 1993 jyldan beri múshe bolyp tabylady. Jalpy, AEHA ýranǵa ie memleketterden bul qazba bailyqty beibit tehnologiialyq úderisterge qoldanylýyn qadaǵalap, talap etedi, - deidi ol.
Amalbek Ómirtai myna ózgermeli álemde energetikalyq qaýipsizdikti azyq-túlik qaýipsizdigimen qatar qoiýǵa bolatynyn aitady.
- Energiiany alý kózderin tiimdi strategiialaý, kombinatsiialaý atomdyq energetikamen tyǵyz bailanysty. Biz qazir saiasi jáne energetikalyq táýelsizdik bir uǵymǵa ainalǵan álemde ómir súrip jatyrmyz, - deidi ol.
Sarapshynyń aitýynsha, Qazaqstan búginderi atalǵan agenttikpen bailanys ornatyp qana qoimai, yqtymaqtasa jumys isteidi.
[perfectpullquote align="full" bordertop="false" cite="" link="" color="" class="" size=""]"Qazaqstan Reseimen óndiristik tsikldy integratsiialaý, sondai-aq Úlbi metallýrgiialyq zaýytynda iadrolyq otyn óndirýdi uiymdastyrý boiynsha birshama nátijeli bastamalar jasady.
Sonymen qatar, elimizde 2017 jyly AEHA-niń tikelei baqylaýymen jumys isteitin az baiytylǵan ýran banki ashylǵan bolatyn. Bul - atom ónerkásibindegi ǵalamdyq úderisterden Qazaqstannyń shetkeri emestiginiń, ajyramastyǵynyń úlken nyshany. Endi AES qurylysyn qolǵa alý jospary aiasynda da AEHA-men aradaǵy áriptestik odan ary qarai arta túseri anyq" [/perfectpullquote]
"Qazaqstan atom elektr stantsiialary" JShS-nyń Joba basqarý jónindegi bas menedjeri Áset Mahambetov elimizde AES qurylysy jobasynyń talqylaýy bastalǵan sátten bastap týra osy máselede Qazaqstannyń AEHA-men tyǵyz áriptestik qarym-qatynasy birden qolǵa alynǵanyn aitady.
- Qazaqstanda Balqash kóli mańynda AES salý máselesi 1997 jyly qaralǵan bolatyn. Osy jobany qaraý kezinde AES-tiń ornalasýy boiynsha aýdan parametrleriniń qolailylyǵyn AEHA-nyń arnaiy missiiasy qarap, rastaǵan. Odan keiin 2016 jyly qazaqstandyq taraptyń shaqyrýy boiynsha AEHA-nyń elimizdiń iadrolyq infraqurylymyna keshendi sholý jónindegi missiiasy ótkizildi (aǵylshynsha INIR – integrated nuclear infrastructure review). Missiia jumysy barysynda AES qurylysynyń qaýipsizdik júiesi jáne ony qarjylandyrýǵa, zańnamalyq-quqyqtyq bazany damytýǵa, qorshaǵan ortany qorǵaýǵa, elektr jelileriniń daiyndyǵyna, bilikti kadrlardy daiarlaý jaǵyna qatysty máseleler talqylandy. INIR missiiasynyń qorytyndysy boiynsha, AEHA arnaiy esep daiyndady. Ol AEHA Bas direktorynyń orynbasary Mihail Chýdakovtyń qatysýymen resmi túrde 2017 jyly qazaqstandyq tarapqa tabystaldy, - deidi ol.
Búginderi Qazaqstannyń iadrolyq infraqurylymyna keshendi sholý jónindegi (INIR) missiianyń bul esebi AEHA-nyń resmi saitynda jariialanyp tur.
Al bul esep, Áset Mahambetovtyń aitýynsha, Qazaqstannyń iadrolyq energetikalyq infraqurylymyn kúsheitý jónindegi is-áreketter josparyn ázirleý kezinde mańyzdy bolyp tabylady.
Qoryta aitqanda, Qazaqstan Respýblikasynyń bolashaqtaǵy atomdyq energetikalyq baǵdarlamasyn damytýda AEHA-nyń barlyq ustanymdaryn eskerip otyrady. Sondyqtan Qazaqstan úshin AHEA-men aradaǵy qarym-qatynas mańyzdy ári úlken rólge ie.
