Halyqaralyq valiýta qorynyń sońǵy derekterine sáikes, osy jyly elimizdiń turǵyn basyna shaqqandaǵy ishki jalpy ónimi aitarlyqtai ósken. Elimizdiń bul kórsetkishi 14,77 myń dollardy qurap, Reseidiń 14,26 myń jáne Túrikmenstannyń 13,34 myń dollarlyq kórsetkishterinen asyp tústi. Sonymen qatar, el bul kórsetkishpen Qytaidy da artta qaldyrdy,- dep habarlaidy Dalanews.kz
Bul mańyzdy kórsetkish el ekonomikasynyń turaqty jáne qarqyndy damýyn, sondai-aq aimaqtaǵy básekege qabilettiligin aiqyn dáleldeidi. Eldiń tabysy iri tabiǵi resýrstarǵa – munai, gaz, ýran men basqa mineraldarǵa negizdelgenimen, sońǵy jyldary eksportty ártaraptandyrýǵa erekshe mán berilip otyr. Bul baǵytta shikizat óńdeý, joǵary qosymsha qundy ónimderdi shyǵarý salalary qarqyndy damyp kele jatyr.
Júrgizilip jatqan reformalar eldiń biznes ortasyn jaqsartyp, sheteldik investitsiialardy tartýǵa jol ashty. Infraqurylymdyq jobalar, logistika men tehnologiia salalaryna salynǵan investitsiialar eldiń ekonomikalyq áleýetin arttyrdy.
Áleýmettik salalardaǵy – bilim, densaýlyq saqtaý jáne áleýmettik qyzmetterdegi qarjylandyrý halyqtyń turmys sapasyn jaqsartyp, eńbek ónimdiliginiń ósýine oń áserin tigizip keledi. Bul óz kezeginde ishki tutynýshylyq naryqty nyǵaityp, el ekonomikasynyń ósýine serpin berip otyr.
Strategiialyq geografiialyq orny elimizdi Eýraziia keńistiginde mańyzdy tranzittik jáne logistikalyq habqa ainaldyrdy. «Bir beldeý, bir jol» bastamasyna qatysý, sondai-aq Resei, Qytai jáne Eýropalyq odaqpen tyǵyz yntymaqtastyq eldiń saýda-sattyq jáne ekonomikalyq bailanystaryn keńeitti.
Qazaqstannyń makroekonomikalyq turaqtylyǵy da onyń jetistikteriniń negizin quraidy. Tómen infliatsiia, ulttyq valiýtanyń turaqty baǵamy jáne biýdjettegi tepe-teńdik úkimet pen Ulttyq bank júrgizip jatqan utymdy saiasattyń jemisi. Bul turaqtylyq jahandyq ekonomikalyq syn-qaterlerge qaramastan eldiń damýyn qamtamasyz etýde mańyzdy faktor bolyp otyr.
