«Zań men tártip» qaǵidaty aiasynda Astana qalasy prokýratýrasy, politsiia departamenti jáne ákimdik birlesip, №4 qalalyq emhanada meditsinalyq qyzmetkerlerge arnalǵan túsindirý jumysyn júrgizdi, dep habarlaidy Dalanews.kz.
Kezdesýde nashaqorlyqtyń aldyn alý, sondai-aq meditsina qyzmetkerleri úshin eńbek zańnamasynyń normalaryn saqtaý máseleleri túsindirildi.
Jyl basynan beri elordada esirtkiniń zańsyz ainalymyna qatysty shamamen 288 qylmystyq is qozǵalǵan.
Sonymen qatar esirtki taratýmen ainalysqan tulǵalarǵa qatysty 95-ten astam is tirkelgen. Zańsyz ainalymnan shamamen 42 keli esirtki tárkilengen.
Astana qalasy politsiia departamenti esirtki qylmystaryna qarsy is-qimyl basqarmasynyń bólim basshysy Áliia Qibatqyzynyń aitýynsha, bul quqyqbuzýshylyqtarǵa kóbine jastar tartylady.
Onyń aitýynsha, sintetikalyq esirtkiler asa qaýipti, sebebi olar tez arada fizikalyq táýeldilik qalyptastyrady.
Mundai zattar kóbine internet jáne jasyryn jarnamalar arqyly taratylady.
Mamandardyń málimetinshe, ustalǵandardyń keibiri tipti esirtki taratqanyn bilmegen kúide qylmysqa aralasyp ketken. Al esirtki jasyrýshylardyń «karerasy» ádette eki aidan aspaidy.
Qylmyskerler tyiym salynǵan zattardy taratý úshin túrli tásilderdi qoldanady: graffiti jazýlar, QR-kody bar jarnamalar, paraqshalar, shtamptar jáne internet-saittar. Jyl basynan beri esirtki nasihattaityn 488-den astam internet-resýrs anyqtalǵan.
Politsiia esirtki qylmystary aýyr jáne asa aýyr sanatqa jatatynyn eske saldy. Qylmystyq jaýapkershilik 14 jastan bastap qarastyrylady.
QR Qylmystyq kodeksiniń 297-babyna sáikes, esirtki quraldaryn zańsyz satyp alý, saqtaý, tasymaldaý, jóneltý nemese satý 5 jyldan 8 jylǵa deiin bas bostandyǵynan aiyrý jáne múlikti tárkileý jazasyn kózdeidi.
Quqyq qorǵaýshylar azamattarǵa esirtki saqtaý nemese satý derekteri belgili bolǵan jaǵdaida, sondai-aq kúdikti tulǵalar týraly aqparat bolsa, politsiianyń senim telefondaryna habarlasýdy eskertti.
Qońyraýlar táýlik boiy 71-63-93 jáne 102 nómirleri arqyly qabyldanady.
Sonymen qatar mamandar meditsina qyzmetkerleriniń kúndelikti jumysy joǵary qaýip jaǵdaiynda ótetinin atap ótti. Oǵan mas nemese esirtkilik mas kúidegi naýqastarǵa barý siiaqty jaǵdailar da kiredi.
Jedel járdem qyzmeti mamandarynyń qaýipsizdigin arttyrý maqsatynda jańa baqylaý jáne qorǵaý sharalary engizilýde. Barlyq brigadada aýdiomonitoring júiesi ornatylǵan. Ol qyzmetkerler arasyndaǵy daýdy azaityp, bailanys mádenietin jaqsartýǵa jáne zańdyq qorǵaýdy kúsheitýge múmkindik beredi.
Eske salaiyq, Qazaqstan Qylmystyq kodeksine meditsinalyq qyzmetkerler men jedel járdem júrgizýshilerine qyzmet barysynda jasalǵan qorqytý jáne kúsh kórsetý áreketteri úshin jaýapkershilik kózdeitin 380-3-bap engizilgen.
