Qazaqstan Premer-ministri Oljas Bektenov Sankt-Peterbýrgte ótken mádeni bailanystardy nyǵaitý jáne kreativti indýstriialardy damytý jónindegi halyqaralyq konferentsiianyń plenarlyq otyrysynda sóz sóilep, TMD elderi arasyndaǵy shyǵarmashylyq yntymaqtastyqty keńeitýge shaqyrdy, dep habarlaidy Dala News.
Is-sharaǵa Resei Úkimetiniń tóraǵasy Mihail Mishýstin, Belarýs Premer-ministri Aleksandr Týrchin, Qyrǵyzstan Ministrler kabinetiniń tóraǵasy Adylbek Qasymaliev, Tájikstan Premer-ministri Kohir Rasýlzoda, Ózbekstan Premer-ministri Abdýlla Aripov jáne Túrikmenstannyń bilim ministri Djýmamyrat Gýrbangeldiev qatysty.
Oljas Bektenov kreativti indýstriialar men mádeni bailanystar salasyndaǵy yntymaqtastyq TMD keńistigindegi eń ózekti baǵyttardyń biri bolyp qala beretinin aitty.
«Biyl naýryz aiynda Qazaqstanda ótken jalpyulttyq referendým qorytyndysy boiynsha jańa Konstitýtsiia qabyldandy, ol 1 shildeden bastap kúshine enedi. Jańa Ata zańymyz memlekettilikti nyǵaitýǵa, «Zań men Tártip» qaǵidaty negizinde Ádiletti jáne Ozyq Qazaqstandy qurýǵa baǵyttalǵan. Uly Dalanyń myńdaǵan jyldyq tarihynyń sabaqtastyǵy alǵash ret konstitýtsiialyq deńgeide bekitilgenin atap ótkim keledi.
Mamyr aiynda Astanada ótken «Altyn Orda» dala órkenietiniń modelin zertteýge arnalǵan halyqaralyq simpoziým mańyzdy oqiǵa boldy, oǵan álemniń 20-dan astam eliniń tarihshylary men mádeniettanýshylary qatysty.
Odan bólek jańa Konstitýtsiiada ziiatkerlik jáne shyǵarmashylyq qyzmetti qorǵaýǵa kepildik berilgen. Osy negizde Qazaqstanda kreativti indýstriia qarqyndy damyp keledi. Jańa naryqtar, jańa jumys oryndary qalyptasyp, ulttyq kreativti ónimdi eksporttaý múmkindikteri keńeitilýde», — dedi Oljas Bektenov.
Premer-ministrdiń aitýynsha, Qazaqstanda kreativti indýstriia 40-tan astam qyzmet túrin qamtidy, bul salada 150 myń adam eńbek etedi, al jalpy qosylǵan qun kólemi sońǵy jyldary tórtten birine artyp, $3 mlrd-qa jetken.
Ol otandyq kino, mýzyka, dizain, oiyn indýstriiasy men tsifrlyq kontent halyqaralyq naryqqa shyǵyp jatqanyn atap ótti.
«Bul turǵyda Qasym-Jomart Kemeluly Toqaevtyń Táýelsiz Memleketter Dostastyǵyna qatysýshy elderdiń kreativti indýstriialar qaýymdastyǵyn qurý jónindegi bastamasy erekshe mańyzǵa ie. Bul format birlesken jobalardy júzege asyrý, tájiribe almasý jáne kreativti ónimderdi ilgeriletý úshin jaǵdai jasaýǵa baǵyttalǵan», — dep atap ótti QR Premer-ministri Oljas Bektenov.
Úkimet basshysy 2026 jyldyń Qazaqstanda Tsifrlandyrý jáne jasandy intellekt jyly bolyp jariialanǵanyn eske saldy.
Ol jasandy intellekt shyǵarmashylyq indýstriialarǵa jańa múmkindikter ashyp jatqanyn aityp, AI-tehnologiialar arqyly beine generatsiialaý salasyndaǵy álemdik kóshbasshylardyń biri sanalatyn qazaqstandyq Higgsfield kompaniiasyn mysalǵa keltirdi.
Bektenov sondai-aq Qazaqstanda mádeni murany tsifrlandyrý baǵytynda júrgizilip jatqan jumystarǵa toqtaldy. Onyń aitýynsha, Qoja Ahmet Iasaýi kesenesi, Tamǵaly petroglifteri men Mańǵystaýdaǵy jerasty meshitteri siiaqty tarihi eskertkishterdi tsifrlyq formatta saqtaýǵa múmkindik beretin arnaiy platforma iske qosylǵan.
Sonymen qatar E-Museum júiesine 300 mýzei qosylyp, ondaǵan myń eksponattyń tsifrlyq katalogy jasalǵan. Al «Qazaq kinosynyń altyn qoryn» qalpyna keltirý aiasynda ótken ǵasyrda túsirilgen 43 film tsifrlyq formatqa kóshirilgen.
Premer-ministr tsifrlandyrý mádeniet pen shyǵarmashylyq salasyn damytýdyń jańa múmkindikterin ashyp, ony zamanaýi ekonomikanyń ajyramas bóligine ainaldyryp otyrǵanyn atap ótti.
