Qazaqstan Respýblikasynyń Prezidenti Qasym-Jomart Toqaevtyń tapsyrmasymen Mádeniet jáne aqparat ministri Arman Qyryqbaev Tedjon qalasyndaǵy memorialdyq keshenge baryp, sonda jerlengen kórnekti korei qolbasshysy, general Hon Bom Donyń rýhyna taǵzym etti, dep habarlaidy dalanews.kz.
Aita keteiik, ministr Koreia Respýblikasyna memlekettik saparmen barǵan Memleket basshysy bastaǵan resmi delegatsiia quramynda.
Keshende qurmet qaraýylynyń qatysýymen arnaiy rásim ótti. Arman Qyryqbaev el táýelsizdigi jolynda kúresip, Otanyn qorǵaýǵa ǵumyryn arnaǵan jandarǵa qurmet bildirip, memorialǵa gúl shoǵyn qoidy. Sondai-aq general Hon Bom Donyń rýhyna taǵzym etti.
Tedjondaǵy bul memorialdyq keshen Koreia Respýblikasyndaǵy asa mańyzdy taǵzym oryndarynyń biri sanalady. Munda elge airyqsha eńbek sińirgen 150 myńǵa jýyq adam máńgilik tynys tapqan. General Hon Bom Donyń esimi Qazaqstan men Koreiany bailanystyratyn ortaq tarihta airyqsha oryn alady. Ol ómiriniń sońǵy jyldaryn Qazaqstanda ótkizip, Qyzylordada jerlengen edi. 2021 jyly Qazaqstannyń qoldaýymen onyń súiegi atamekenine jetkizilip, Tedjonda qaita jerlendi.
Biyl general Hon Bom Donyń súiegi Qyzylordadan Koreia Respýblikasyna jetkizilgenine bes jyl tolady. Onyń taǵdyr joly eki halyqty ózara jaqyndastyrǵan ortaq tarihtyń taǵylymdy bir belesine ainaldy.
Sapar sońynda Arman Qyryqbaev qurmetti qonaqtar kitabyna estelik jazba qaldyrdy. Memorialdyq keshendegi bul rásim eki eldiń tarihi murasyna degen qurmetti aiǵaqtap, Qazaqstan men Koreia arasyndaǵy bailanysty odan ári nyǵaitýdyń mańyzyn kórsetti.
