Premer-ministrdiń orynbasary – Ulttyq ekonomika ministri Serik Jumanǵarin búgin Úkimette ótken brifingte 2026 jyly Qazaqstanda eń tómengi jalaqy mólsherin arttyrý josparlary bar-joǵyna qatysty qoiylǵan suraqqa jaýap berdi, dep habarlaidy Dalanews.kz.
Jýrnalister buǵan deiin eń tómengi jalaqy (ETJ) mólsherin 90 myń teńgege deiin arttyrý týraly oi aitylyp qalǵanyn eske saldy.
"Ázirge, shynymdy aitsam ETJ mólsherin arttyrý týraly bizde jospar joq. Búgingi tańda ol 85 myń teńgeni quraidy jáne biz ony ósirýdi qarastyryp otyrǵan joqpyz", – dedi Serik Jumanǵarin.
Qarjy ministri Mádi Takiev buǵan deiin tek esep aiyrysýlarǵa qatysty bul rette yqtimal jaǵdai týraly aitylǵanyn naqtylady.
"Eger barlyq kórsetkishterdi alyp qaraityn bolsaq, onda ortasha eń tómengi jalaqy mólsheri shamamen 90 myń teńge bolýy tiis. Biraq qazirgi jaǵdaidy eskere otyryp, biz ony qazirgi deńgeide qaldyrǵandy jón dep sheshtik", – dedi ol.
2025 jylǵy 27 maýsymda QR Qarjy ministri Mádi Taqiev Qazaqstandaǵy ETJ mólsherin qaita qarastyrlýy múmkin ekenin aitqan edi. Sol kezde Eńbek jáne halyqty áleýmettik qorǵaý ministri Svetlana Jaqypova birneshe institýt eńbek ónimdiligi boiynsha, óńirler bólinisinde, salalar bólinisinde ortasha jalaqy boiynsha naqty kórsetkishterdi qamtamasyz etýge qatysty zertteýler júrgizip jatqanyn málimdegen. Olardyń barlyǵynyń esebi ETJ-ǵa súienedi.
